СӨ Правительствотын ааспыт 2023 сыллааҕы үлэтин Ким Борисов салайааччылаах бастакы бөлөх Маймаҕа олохтоохторугар отчуоттаата.
Сынньалаҥ кииҥҥэ эбии сынньалаҥы тэрийэргэ кинотеатр, өр кэмҥэ туруорсубут асфальт суол тиийиитин, сибээһи тупсарыыны, алын сүһүөх кылаастары итии аһынан хааччыйыыга көрүллэр үбү үрдэтэллэрин туруорустулар.
Кэтэх хаһаайыстыбалаах дьоҥҥо ынахха көрүллэр субсидия бэриллэр кэмин кыстыкка киириигэ, идэһэни сөпкө дьаһанар туһугар сэтинньигэ биэрэр ордук этэ диэн санааларын тириэртилэр. Газ оһох техническэй көрүүтүн өҥөтө балысханнык үрдээбитин бэлиэтээтилэр, сөпсөспөттөрүн этиннилэр.
Отчуоттааччылар асфальт суол оҥоһуутугар бырайыактыыр үлэ ыыта сылдьалларын туһунан хоруйдаатылар уонна 2025 сылга оҥоһуллуоҕа диэн эрэннэрдилэр.
Быйыл Дьокуускайга ыытыллар «Азия оҕолоро» 8-с норуоттар икки ардыларынааҕы спорт оонньуутун төрүччээччи, бастакы президеммит Михаил Ефимович Николаев аатын үйэтитэн, кини аатынан ыытыллара буоллар диэн ыллыктаах санааны эттилэр.
Маймаҕалар СӨ Правительствотын ааспыт 2023 сыллааҕы үлэтин биир санаанан биһирээтилэр.
Семен Аргунов