Сабрина Корякина И.Е. Винокуров аатынан Намнааҕы педагогическай колледжка черчение уонна уруһуй искусствотын идэтигэр төрдүс курска үөрэнэр. Сабрина бу идэҕэ туох санааттан үөрэнэ кэлбитин туһунан маннык кэпсиир.
Муома улууһун Сасыр нэһилиэгиттэн төрүттээхпин. Муос кыһыытынан 7-с кылаастан дьарыктанабын. Миигин муос кыһыытын үөрүйэхтэригэр үлэ учуутала Егор Васильевич Тихонов үөрэппитэ. Төрөөбүт дойдум айылҕатын кэтээн көрөрбүн сөбүлүүрүм уонна эбэм биһиги норуоппут туһунан кэпсээннэрин, үһүйээннэрин олус интэриэһиргээн истэрим. Үһүйээннэр уонна уос номохторун көмөтүнэн биһиги норуоппут кэнэҕэски ыччатыгар билиини уонна муудараһы хаалларбыттара. Бу үһүйээннэр, кэпсээннэр үйэтитиллэллэригэр бэйэм кылааппын киллэрэр баҕаттан муоһунан кыһарга санаммытым.
Кыыллары уонна көтөрдөрү оҥорорбун сөбүлүүбүн. Тоҕо диэтэргит, хотугу норуоттар остуоруйаларыгар уонна үһүйээннэригэр кинилэр мэлдьи бааллар уонна бэлиэ миэстэни ылар дьоруойдар. Ордук элбэхтик мин үлэбэр хотугу таба уобараһа көстөр. Кинилэргэ мин бүөбэйдээн ииппит Диди, Вальтер, Барон табачааннарым ойууланаллар.
Ордук тайах муоһуттан үлэлиирбин сөбүлүүбүн. Сымнаҕас, улгум эрээри олус бөҕө-таҕа матырыйаал. Маны сэргэ, хайа бараанын, табатын муостарыттан уонна сэлии уҥуоҕуттан хас да үлэни оҥорбутум.
Бу үлэлэрбинэн оройуон эвенек табаһыттарын бырааһынньыгын быыстапкаларыгар хаста да кыттыбытым. Намнааҕы педагогическай колледжка үөрэнэ киирэн баран «Эдэр уус» диэн иккис өрөспүүбүлүкэтээҕи конкурска кыттаммын, «Муоһу кыһар эдэр маастар» номинацияҕа бастакы миэстэни ылбытым. Бу дьыл сааһыгар ыччат Дельфийскэй оонньууларыгар «Художественное ремесло» номинацияҕа өрөспүүбүлүкэ аатыттан кыттыбытым.
Лена НОГОВИЦЫНА