Өрөспүүбүлүкэтээҕи “Муус Устар-2024” ыччат фестивалыгар Нам улууһун ыччата кыайыыга дьулуһар күннэрэ үүннүлэр.
“КҮН” аныгылыы үҥкүү куонкурска 26 хамаанда кыттыыны ылбытыттан, Нам улууһа 9 бастыҥ улуус иһигэр киирдэ. Намнааҕы педколледж “НрЖ” устудьуон бөлөҕө олунньу 16 күнүгэр салгыы үҥкүүлүөҕэ.
“Нам улууһун баһылыга Юрий Слепцов ыччаттан саҕалаан улуус бары олохтоохторун сомоҕолуур үлэлэри күүстээхтик ыытар, этиллибит, киирбит толкуйдары өйүүр. Эдэр дьоммутугар Аар Ытык Куба бэлиэлээх Наммыт улууһун бэлиэтиир футболкалар, бейсболкалар бэлэх туттарылыннылар. Тэрээһинтэн тэрээһиҥҥэ кэтиллэр биир халыыптаах көстүүм баар буолла”, – диир Нам улууһун дьиэ кэргэн уонна ыччат политикатын отделын салайааччыта Екатерина Евстафьева.
Кэрэҕэ, сырдыкка талаһар, саҥаны айар, уратыны оҥорор ыччатардаах буоллахпытына, улуус инникилээх буолар. Санааларын ууран үгүс хайысхаҕа ылсар ыччаттарбытыгар Россия, өрөспүүбүлүкэ, улуус салалталара болҕомто уураллара, эдэр дьону кэрдиистэн кэрдиискэ өрө таһаараллара, кэтээн көрөн сайыннараллара олус туһалаах.
Харысхан Попов