М.К. Аммосов аат. култуура дыбарыаһыгар Нам улууһун баһылыгын инаугурацията буолла. Юрий Слепцов улуус баһылыгынан талыллыбытын улуустааҕы ТИК председателэ Николай Парников иһитиннэрэн бигэргэттэ.
Дьон итэҕэлин ылбыт Юрий Иннокентьевич баһылык дуоһунаһыгар иккиһин талыллыбытынан Правительство председателин бастакы солбуйааччы Дмитрий Садовников, норуот депутата Алексей Еремеев, тыа хаһаайыстыбатын министрэ Александр Атласов, Саха сирин баһылыгын администрациятыгар олохтоох бэйэни салайыныы департаменын салайааччыта Иван Попов, Алексей Винокуров салайааччылаах улуус депутаттарын сэбиэтэ, нэһилиэктэр баһылыктара, Нам улууһун аҕам саастаахтара эҕэрдэлээтилэр.
“Намым улууһун олохтоохторо, Эһиги үрдүк итэҕэлгитин ыламмын, Дойдубут сайдарын туһугар толору күүспүн ууран тураммын үлэлиэҕим”, – диэн эрэлин биллэрэр Нам улууһун баһылыга Слепцов Юрий Иннокентьевич.
Үөрүүлээх тэрээһиҥҥэ Нам улууһа Ил Дархан дуоһунаһыгар Айсен Николаевка, “Биир ньыгыл Россия” партияҕа куоластааччы ахсаанынан республика үрдүнэн бастакы миэстэҕэ тахсыбытын Алексей Еремеев эҕэрдэлээн тыл эттэ. Ол курдук, Алексей Ильич куоластаабыт быыбардааччыларга халлаантан сиргэ тиийэ махтанарын биллэрдэ. Бэлиэтээн эттэххэ, Иван Попов иһитиннэрбитинэн, Саха сиригэр 9 улуус баһылыга талыллыбытыттан, саамай үрдүк быраһыаннаах Юрий Слепцов буолар.
Биһиги улууспут баһылыга Юрий Слепцов республикаҕа биир тарбахха баттанар, маҥнайгы күөҥҥэ сылдьар баһылыктартан биирдэстэрэ буоларын ыйан туран, кэлэр сылларга бары хайысхаҕа үгүс үлэ күүтэрин Алексей Ильич эттэ.
“Улуу “Эҥсиэли” Эбэ хочотугар олорорбутунан киэн туттан тураммыт, Нам улууһа инникитин биир санаалаах буолуохтаах! Нам дьоно-сэргэтэ тутуспутунан, бу курдук, куруук барытыгар бииргэ буолуохха!” – диир норуот депутата.
Салайар киһи үлэтэ тахсыылаах буолара, кинини тулалыыр чугас дьонуттан, тыылыттан улахан тутулуктаах. Манна улахан оруоллаах дьиэ кэргэн ийэтэ, кини сылаас илиитэ буолар. Улуустааҕы култуура управлениетын салайааччыта Семен Ядрихинскай, Ленскэй нэһилиэк баһылыга Петр Сокольников Юрий Иннокентьевич олоҕун аргыһыгар Лариса Иннокентьевнаҕа мааны тыллаах, истиҥ махталлаах кэрэ сибэккилэри туттардылар.
Харысхан Попов