Өрөспүүбүлүкэтээҕи “Муус Устар-2024” ыччат фестивалыгар Нам улууһа инникилэр кэккэлэригэр тахсарга күүһүн түмэр.
Эҥсиэли хочотуттан бүгүн эдэр педагогтар Александра Афанасьева, Анна Трапезникова, Дмитрий Местников, Егор Протопопов, Михаил Габышев “Педагог будущего поколения, посвященный первому президенту М.Е. Николаеву” дьыалабыай оонньууга бэйэлэрин үөлээннээхтэрин кытта көрүстүлэр.
Нам эдэр педагогтара иһитиннэрбиттэринэн, тэрээһиҥҥэ 5-тии киһилээх өрөспүүбүлүкэ 34 улууһа бүтүннүү кэлбит. Дьыалабыай оонньуу бастакы президент Михаил Николаевка ананарынан, бүгүҥҥү көлүөнэ педагогтара Саха сиригэр туох саҥа сүүрээни киллэриэхтэрэ этэй диэн ыйытыыга хоруй көрдүүр эбит. “Муус Устар-2024” кыттыылаахтара салгыы сарсын толкуйдары тобулуохтара.
“Саха сирин улуустарыгар билигин долгутуулаах уонна тыҥааһыннаах күннэр тураллар. Улууспут тэрилтэлэрин салайааччыларыгар махтаныам этэ. Ыччаты күүскэ өйөөннөр, эдэр үлэһиттэр сайдалларын, элбэҕи билэллэрин-көрөллөрүн туһугар илиилэрин утары ууналлара хайҕаллаах”, – диир Нам улууһун дьиэ кэргэн уонна ыччат политикатын отделын салайааччыта Екатерина Сергеевна.
Намтан “Муус Устар-2024” фестиваль сүүмэрдиир түһүмэхтэрин ааспыт биир дойдулаахтарбыт олунньу 15 күнүгэр салгыы сорудахтары толоро айанныахтара: “Хомус тэтимэ” – эдэр хомусчуттар Сахайаана Колодезникова, Геннадий Игнатьев, Алгыс Павлов; “Футболга Фристайл “ЯФФ” – “Барыта спорка, барыта доруобуйаҕа, барыта Саха сиригэр!” – Александр Михайлов, Иосиф Намылов, Денис Сивцев, Эрнест Оленов футбол мээчигин төһө баһылаабыттарын көрдөрүөхтэрэ; “Үгэһи билии кэмэ” Саха норуотун төрүт үгэстэрин, култууратын билии күрэхтэһиигэ – Анна Слепцова, Вадим Бочкарев, Геннадий Игнатьев; “АКЦЕНТ 2” уруһуй куонкурсугар – Алина Кычкина; “Айар” медиа – Елизавета Скрыбыкина; “Киэҥ Саха сирин кистэлэҥнэрэ” видеоролик конкурсугар – Люция Жиркова; ГТО – Саина Протопопова, Василисса Протопопова, Ньургуяна Копырина, Елена Слепцова, Валентин Ядреев, Ньургун Ширяев, Альберт Осипов, Алексей Никифоров уонна Агрокластер – Юрий Петров.
Биир дойдулаахтарбытыгар, ыччаттарбытыгар буолаары турар түһүмэхтэргэ ситиһиилээхтик кытталларагыр баҕарыаххайыҥ.
Харысхан Попов