Бу ааһан эрэр нэдиэлэбит саҕаланыыта Нам сэлиэнньэтигэр «Ai_LEK» («Ай-Лек») диэн бэрт сэдэх ааттаах, интэриэһинэй дьарыктаах уус-уран мастарыскыай үлэтин саҕалаата.
Мастарыскыайы оҕотун көрөн олорор эдэр ийэ Лилия Крюкова аста. Кини Дьокуускайга Туяра Семейщикова «Таптал» диэн устуудьуйатыгар гипсэнэн, туойунан охсуу ньыматыгар үөрэммит. Итиэннэ бэйэ дьыалатын арыныахха сөбүн тобулан, социальнай хантараакка киирсэн, бырайыагын көмүскээн ылан, баҕа санаатын толорбут. Мастарыскыайын аатын хаһаайка Ai –Ай-тут, LEK – ЛЕК — Лилия Ефремовна Крюкова диэн бэйэтин аатын айар-тутар тыл ситимин кытта дьүөрэлээн толкуйдаан таһаарбыт.
Лилия мастарыскыайыгар ким баҕалаах кэлэн илиитин иминэн тутан-хабан, ытыһын сылааһынан саҕан, үйэлээх уонна үтүө тыыннаах иһиттэри, араас өйдөбүнньүк бэлиэлэри, малы-салы оҥоруон сөп. Былыргы сахалар мас, туос иһиттэр иннилэринэ, туой иһиттэн аһыыллар этэ диэн чинчийээччилэр бэлиэтииллэр. Онон туойунан охсон иһит араас көрүҥүн оҥоруу хааммытыгар баара саарбахтаммат.
Бу былыргы дьарыкпытынан улууспутугар күөс охсооччу Лариса Тавалакова Намнааҕы педагогическай колледжка идэтийбит таһымҥа дьарыктанарын билэбит. Өрөспүүбүлүкэҕэ, бүтүн дойдуга биллэр күөсчүт Лариса Ефимовна сүрүннээн Нам туойуттан күөс охсор. Кини дьарыга, ньымата удьуор былыргы дьарыкпытын сөргүтэн тэрийии эбит буоллаҕына, «Ai_LEK» мастарыскыай аныгылыы моһуоннаах, ураты иһити суруктаан-бичиктээн оҥорон, баҕалаахтар мустан иллэҥ кэмнэрин туһалаахтык атааралларыгар анаммыт былаһаакка буолар.
Билигин дьон, маассабай оҥорон таһаарыыттан атын, сэдэх, илиинэн оҥоһукка ордук тардыһар буолла. Лилия мастарыскыай хаһаайкатын быһыытынан, бэйэтин ураты оҥоһуктарын атыылыан, тус сакаастары ылыан сөп. Бу дьарыга киниэхэ уус-уран санааларын, көрүүлэрин олоххо киллэрии эрэ буолбакка, дохуот оҥосторугар кыахтары үөскэтиэҕэ.
Мастарыскыай арыллар бэлиэ күнүгэр хаһаайканы, көмө-тирэх буолбут тэрилтэлэр салайааччылара: «Мой бизнес» киин Нам улууһугар салайааччыта Марфа Тарабукина уонна социальнай харалта управлениетын начальнига Людмила Петрова кэлэн эҕэрдэлээтилэр.
Бу күн ыалдьыттарга интэриэһинэй, таһаарыылаах маастар-кылаас ыытылынна.
Бэлиэтээн эттэххэ, «Ai_LEK» уус-уран мастарыскыай «Алтан» атыы-эргиэн дьиэтигэр иккис этээскэ баар. Интэриэһиргээбиттэр 8 914 261-75-23 нүөмэргэ билсиҥ.
«Мой бизнес» региональнай киин урбаанньыттарга дойду президенэ В.В. Путин олохтообут национальнай бырайыактарын иитинэн, «Эффективная и конкурентная экономика» национальнай бырайыагынан өйөбүл оҥорор. Киин ыытар үлэтин-хамнаһын, араас тэрээһиннэрин, судаарыстыбаннай өйөбүлү интэриэһиргээбиттэр Мойбизнес14.рф сайтка көрүөххүтүн, 8(800)100-58-80 босхо эрийэн тиийэн сүбэ ылыаххытын сөп.
Лена Ноговицына