Саха сирин мас-рестлиҥҥэ федерациятын Кубогар Нам улууһа өр сылларга күүтүллүбүт 3-с бочуоттаах миэстэҕэ тахсары ситистэ. Ол курдук, федерация Кубогар өрөспүүбүлүкэ 6 улууһун мадьынылара аат-ааттаан мас-рестлинг түһүлгэтин тыыныгар мустубуттара.
“Кубокка кубокка 8 бастыҥ хамаанда көрсөрө. Билигин Үрдүкү лига уонна Бастакы лига диэҥҥэ араардылар. Нам улууһа Бастакы лигаҕа киирэн Амма, Үөһээ Бүлүү, Бүлүү, Томпо, Өлүөхүмэ мадьыныларын кытта помостка көрүстэ”, – диэн мадьыны Анатолий Гладков этэр.
Бастакы лигаҕа 19 мадьыны утарыта көрсөр буоллаҕына, Үрдүкү лигаҕа 27 мадьыныга тиийэ кыттарын Анатолий Гладков бигэргэтэр. Намнар маҥнайгы көрсүһүүлэрэ лиидэр улууска Аммаҕа 12:7 очконан баһыйтарбыттар. Бу куһаҕана суох киирсии. Онтон бүлүүлэри кыайаннар 3-кэ Үөһээ Бүлүүгэ сабырыйтараллар. Кыайыылааҕынан Амма, иккискэ Үөһээ Бүлүү уонна үһүскэ Нам улуустара тахсаллар.
Мас-рестлиҥҥэ Нам улууһун сүүмэрдэммит хамаандатын көрдөрүүтэ – улуустааҕы спорт управлениета, федерация, тренер, энтузиаст дьон мас тардыһыыга оскуолалаах мадьыныларын бииргэ түмэн хаттаан эргиппиттэриттэн, үлэлээн аалы оннуттан хамсаппыттарыттан тахсар. Бэлиэтээн эттэххэ, 2024 сыл саҕаланыытыттан улуус мас тардыһыыта улуустааҕы спорт управление салайааччытын солбуйааччытыгар Сергей Софроновка анаммыта.
“Нам улууһун мадьынылара федерация Кубогар маныаха диэри 3-с миэстэҕэ тахсан турбуппут суох. Арай, 2015 сыллаахха өрөспүүбүлүкэ чемпионатыгар аан маҥнай 3-с миэстэ буолбуппут. Оччолорго Нам улууһугар буолбут чемпионакка оҕолор бөлөхтөрө диэн суоҕа.
Салгыы оҕолору дьарыктыырбытын ыһыктыбакка үлэлэһэрбит ирдэнэр. Дьоммутун сааһылаан сүүмэрдэммит хамаанда тэрийэн ситиһиигэ тиэрдии – мас-рестлинг тула биир санааны уурууттан, улууспутугар сыл устата үгүс түһүмэхтээх күрэхтэһиилэри ыытыыттан таҕыста диэхпин баҕарабын», – диир аан дойду хас да төгүллээх кыайыылааҕа мадьыны Гладков.
Хамаанда күрэхтэһииттэн күрэхтэһиигэ сырыттаҕына үүнэр-сайдар. Нам улууһун сүүмэрдэммит хамаандата өйүн-санаатын, күүһүн-уоҕун кэлэр сылга олунньуга өрөспүүбүлүкэ чемпионатыгар ууруоҕа.
Харысхан Попов