Нам улууһун 2 тыһ. тахса олохтооҕо «Жилье и городская среда» национальнай бырайыак «Хаарбах туруктаах дьиэттэн дьону көһөрүү» республикатааҕы аадырыстаах программатынан олорор усулуобуйалара тупсуоҕа. Бу туһунан СР бастакы вице-премьера Дмитрий Садовников иһитиннэрдэ.
Билиҥҥитэ, Нам сэлиэнньэтигэр «АЭБ-Капитал», «Намстрой», «Технопрофи» тутуу хампаанньалара элбэх квартиралаах үс дьиэни олоххо киллэрээри бэлэмнииллэр.
31 квартиралаах маҥнайгы дьиэ «АЭБ-Капитал» хампаанньа тутар саҥа кыбаарталыгар баар. Бу оройуоҥҥа эрдэ түөрт дьиэ тутуллубута, бастакылара өссө 2021 сылга киирбиттэрэ. Кыбаарталга уопсайа 10 тыһ. кв. м иэннээх 8 дьиэ тутуллара былааннанар. Квартиралар улахан аҥаардара хаарбах дьиэттэн көһүүгэ аналлаахтар.
Иккис, 39 квартиралаах дьиэни, «Намстрой», оттон 22 квартиралаах үһүс дьиэни «Технопрофи» хампаанньалар туталлар.
Дмитрий Садовников:
Эбийиэктэр бэлэмнэрэ 90% тэҥнэһэр. Үлэлэр түмүктэнэр түһүмэххэ сылдьаллар. Онон сотору кэминэн дьиэлэр олоххо киириэхтэрэ. Бу үс дьиэҕэ 90-тан тахса ыал квартира ылыаҕа, кинилэр бары хаарбах туруктаах дьиэлэртэн кэлиэхтэрэ.
Маны тэҥэ республикатааҕы аадырыстаах программанан 29,3 тыһ. кв. м иэннээх 96 хаарбах дьиэни көһөрөргө былаан баар. Ол түмүгэр 2 тыһ. тахса улуус олохтооҕо олорор усулуобуйата тупсуоҕа. Программа Нам улууһун 18 нэһилиэгэр олоххо киллэриллэр.
Бэлиэтээн эттэххэ, РФ президенэ Владимир Путин көҕүлээбит национальай бырайыагынан, республикабытыгар хаарбах дьиэттэн көһөрүү программа киэҥ далааһыннаахтык ыытыллар. 2019 сылтан 40 тыһ. киһи хаарбаҕынан билиниллибит 700 тыһ. кв м иэнтэн көһөрүлүннэ. Бу сыллар устата муниципальнай тэриллиилэргэ 200-тэн тахса элбэх квартиралаах дьиэ олоххо киирдэ.
Лена Ноговицына