Намҥа олунньу 11 күнүгэр “Уопсастыбанньык дьиэтигэр” тэрилтэлэр бастыҥ хамаандалара дартс чемпионатыгар көрүстүлэр. Финалга киирэр иһин 27 тэрилтэ хамаандата күрэхтэспит.
“2025 сыл устата сэлиэнньэ тэрилтэлэрэ икки түһүмэхтээх чемпионакка күрэхтэһэр буолуохтара. Ол курдук, хамаандалар чемпионат 1-кы түһүмэҕэр 5 бастыҥы быһаарыахтара уонна финалга (2-түһүмэх) көрсүөхтэрэ”, – диир “Лидер” спорт киин салайааччыта Иван Яковлев.
Дартс чемпионатыгар кыайыылааҕынан НКТЭ үлэһиттэрэ буоллулар. Кинилэр 5409 очукуо ыланнар, дротигы быраҕары сатыылларын көрдөрөллөр. 4968 очукуолаах Намнааҕы алын кылаас оскуола хамаандата иккис миэстэ буолар уонна үһүскэ 4646 очукуолаах улуустааҕы гимназия тахсар. Намнааҕы педколледж 4136 очукуо ылан 4-с миэстэ буолар.
Дьоҕус тэрилтэлэргэ Намнааҕы тыа хаһаайыстыбата хаардыы хаамар – 4560 очкуо. Иккис миэстэ – “Ростелеком” тэрилтэ (3689 очукуо) уонна үһүс миэстэ – Социальнай фонд (3642 очукуо). Онтон Ньургун Тимофеев аатынан өрөспүүбүлүкэтээҕи Олимпийскай эрэл спорт оскуола (3616 очукуо), “Кыталык” уһуйаан (3251 очукуо) кэлэллэр. Күрэхтэһии түмүгүнэн көрдөххө, бары тэҥ баайыылаах тэрилтэлэр көрсүбүттэр.
“Дартс чемпионатыгар тэрилтэ араас идэлээх үлэһитэ күрэхтэстэ. Бастакы түһүмэххэ бастаабыт Намнааҕы алын кылаас оскуолата финалга кэлэн иккис буолла. Оттон Социальнай фонд бэһис миэстэнэн киирэн баран иккис күҥҥэ түмүгүн тупсаран 3-с миэстэҕэ таҕыста. Бастыҥ дартсменнарбыт Улуу Кыайыы 80 сылыгар анаммыт анал мэтээллэринэн наҕараадаланнылар.
Быйылгы сылга бу маҥнайгы чемпионат буолар. Күрэхтэһиилэри икки түһүмэхтээх чемпионаттарга кубулутан ыытар интэриэһинэй буолан таҕыста”, – диэн санаатын үллэстэр Иван Васильевич.
Урукку сылларга сүүмэрдэммит хамаандаҕа дьоҕус тэрилтэттэн биирдии, иккилии киһи киирэрэ. Оччотугар, билигин хамаанда туруоран кыттыыны ылар тэрилтэлэр бэйэлэрин көрдөрүөхтэрэ.
2025 сылга Нам сэлиэнньэтин хас биирдии тэрилтэтэ 16 көрүҥҥэ кытта сатыаҕа. Сыл түмүгүнэн, бастыҥнары кытта саамай элбэх күрэхтэһиигэ кыттыбыт тэрилтэҕэ анал аат иҥэриллиэҕэ. Онон, тэрилтэлэр буолар күрэхтэһиилэргэ интэриэстээх буолуохтара.
Кэлэр икки түһүмэхтээх чемпионат – корнхол көрүҥэ былааҥҥа турар.
Харысхан Попов