«Нам улууһа» МТ депутаттарын сэбиэтин бэрэссэдээтэлэ Алексей Винокуров Саха парламеныгар ыытыллыбыт «Патриотизм в условиях специальной военной операции: опыт, проблемы, перспективы» диэн төгүрүк остуолга кыттыыны ылбыт.
Бэйэтин этиитигэр Алексей Иванович байыаннай дьайыыга ыҥырыллан барбыт сулууспалаахтар дьиэ кэргэттэригэр көмө миэрэлэр туһунан улуус холобуругар кэпсээбит. Кини эппитинэн, бу саас баһылык Юрий Слепцов салалтатынан Нам улууһуттан делегация байыаннай дьайыы буола турар сиригэр тиийэн тактическай сэбилэнии, таҥас-сап, саха быһахтарын, харысхаллары уонна үөрэнээччилэр суруктарын туттартаабыттар.
«Сэтинньигэ делегация байыаннай дьайыы буола турар сиригэр уочараттаах сырыыта былааннанар. Билигин наадалаах мал-сал, оҕолор суруктара, байыаннай сулууспалаахтар дьиэ кэргэттэриттэн баһыылка хомуйуута бара турар», — диэн Алексей Винокуров иһитиннэрдэ.
Төгүрүк остуолга кэтэхтэн уонна тыыннаахтыы 120-тэн тахса киһи кыттыбыт. Кинилэр истэригэр норуот депутаттара, СВО кыттыылаахтара уонна кинилэр дьиэ кэргэттэрэ, министерстволар, ведомстволар эппиэттээх үлэһиттэрэ, судаарыстыбаннай тэрилтэлэр бэрэстэбиитэллэрэ уо.д.а. кыттыбыттар.
Лена Ноговицына