Нам улууһугар быйылгы оттук сезона хаһан саҕаланарын уонна онно бэлэмнэнии үлэтэ хайдах бара турарын НКТЭ тэрилтэ кылаабынай инженерэ Евтропий Тихонов иһитиннэрэр:
— Быйылгы оттук сезона эрдэ, балаҕан ыйын 4 күнүттэн, саҕаланар. Ити графикпытыттан 5 күн эрдэ оттуллабыт. Гааһынан, да чоҕунан да оттуллар хочуолунайдар бары бииргэ үлэлэрин саҕалыыллар. Онон үлэ хаамыыта күүскэ бара турар. Билиҥҥи туругунан, биһиэхэ 51 хочуолунай баар, онтон 43 гааһынан, 8 чоҕунан оттуллар. Көбөкөҥҥө 2 саҥа хочуолу туруордубут, өрөмүөннүүр биригээдэбит эргэрбит теплотрассалары уларыттылар, быстах өрөмүөннэр бара тураллар. Оттук сезонун саҕалыырга биһиги улуус үрдүнэн 90% отторго бэлэммит.
Прокопий Пестряков, гааһынан оттуллар хочуолунайдар начальниктара:
Улуус үрдүнэн газооператордар медицинскэй көрүүнү бары аастылар. Гааһынан оттуллар хочуолунайдар учуоттуур прибордара сыллааҕы бэрэбиэркэни бардылар. Итини тэҥэ, кырааска, сууйуу үлэлэрэ хочуолунайдарга күһүн аайы ыытыллар
Сергей Кокарев, тэрилтэ профсоюһун комитетын председателэ:
Үлэһиттэргэ кыстык кэнниттэн эмтэнэллэригэр, сынньаналларыгар усулуобуйа тэриллэр. Бу сайын санаторнай-курортнай (эмтэниилээх) санаторийдарга 14 киһи эмтэнэн, доруобуйаларын бөҕөргөтөн кэллилэр. Маннык сылын аайы быраас көрдөрүүтүнэн, үлэһиттэрбит баран эмтэнэн, сынньанан кэлэллэр. Биһиги тэрилтэ эмтэнии путевкатын аҥарын уйунабыт уонна өйүүбүт.
Светлана Попова – Дайаана