Нам улууһугар ахсынньы 9 күнүгэр төрүт ыстаныыга Саха сирин Федерациятын Кубогар барыта 10 хамаанда, 62 спортсмен кыттыыны ылбыта.
Федерация Кубогар Валерия Олесова, Кай Адамов, Игорь Скрябин, Ньургун Сокольников курдук өрөспүүбүлүкэ таһымнаах ыстанааччылар күрэхтэспиттэрин ааттыахха сөп.
Былырыыҥҥы Федерация Кубогар Нам улууһа чаҕылхайдык кыайыы көтөллөммүтүгэр, дьон-сэргэ өйүгэр-санаатыгар соһуйуу, өмүрүү өйдөбүлэ эмискэ үөскээбиттээҕэ. Оттон быйылгы атах оонньууларыгар Нам хамаандата кыайыытын хатылыырыгар 14 очко тиийбэтэ. Ол эрээри, омос көрүүгэ хамаанда соһуччу инникилэргэ тахсара улахан үлэттэн кэлэрин атах оонньуутугар толорооччу дириэктэр Максим Ойогостуров бигэргэтэр.
«Күүстээх үлэ барарыгар улуустааҕы спорт управлениетын салайааччыта Павел Иванов үлэтэ биллэ көстөр. Онуоха тренердар дьаныардаах үлэлэри ыыталларыттан ситиһии кэлэр диибин. Холобура, бары күүһүн уурар Николай Кейметиновы үчүгэй үлэлээх тренер диэн сыаналыахха сеп. Туох барыта улахан өйөбүлтэн кэлэр», – диир күрэхтэһии кылаабынай судьуйата Максим Николаевич.
Уопсай түмүккэ 110 очколаах Мэҥэ Хаҥалас, иккискэ 96 очколаах Нам, үһүскэ 90 очколаах Хаҥалас улуустара тахсыбыттар. Күрэхтэһии төһө да бүппүтүн иһин, арай, улууспутуттан ситиһиилээхтик ыстанар Владлен Сергеев ыстаммыта буоллар, баҕар, быһыы-майгы атын буолуо эбит диэн сабаҕалыахха сөп.
«Кыайыылаах хамаанда 100 тыһ. суумалаах, иккис миэстэ 60 тыһ. суумалаах, үһүс 40 тыһ. суумалаах сертификаттарынан наҕараадаламмыттара. Ону тэҥэ, төрүт ыстаныыга Нам улууһун федерацията Намтан Анастасия Матвееваҕа, Мэҥэ Хаҥаластан Игорь Скрябиҥҥа, Хаҥаластан Валентин Васильевка анал бириистэри туттарда», — диир тренер Николай Кейметинов.
Харысхан Попов