Элбэх квартиралаах уонна чааһынай дьиэлэргэ баһаартан куттал суох буолуу быраабылатын тутуһууну ыытар үлэни тустаах тэрилтэлэр тиһигин быспакка ыыталлар. Ол да буоллар, дьон сэрэҕэ суох туттунуутуттан, уот ситимин дэҥ холбоһуутуттан о.д.а. биричиинэлэртэн баһаар буолара баар суол.
2023 сыл саҕаланыаҕыттан улууспутугар уопсайа 12 баһаар бэлиэтэммит. Эт-хаан эчэйиитин ылбыт, өлбүт суох. Ааспыт сылга 17 быһылаан тахсыбыт, онно 1 киһи суорума суолламмыт, 1 киһи эчэйии ылбыт.
Баһаар сүрүн биричиинэлэринэн буолаллар:
— Оһоҕу туһаныыга баһаартан сэрэхтээх буолуу быраабылатын кэһии;
— Транспорт систиэмэтин үлэтэ дьиэгириититтэн;
— Уот ситимин дэҥ холбоһуутуттан;
— Табах тардыыга сэрэҕэ суохтук туттууттан;
— Электрическэй тэрили сэрэҕэ суохтук туттууттан.
Онтон аҕыйах холобуру аҕаллахха, аһаҕас уоту сэрэҕэ суохтук туттууттан 2 гараж, оһоҕу сэрэҕэ суохтук оттууттан баанньык, массыына электрикатын дьиэгириититтэн КАМАЗ, бортобуой УАЗ массыыналар, хаарбах туруктаах электрическэй тэрили туттууттан атыы-эргиэн киоската, сэрэҕэ суохтук табахтаабыттарыттан хаһаайына суох сарай, хаптаһын туалет умайбыттар. Итиэннэ, от ыйын 9 күнүгэр киһи үөйбэтэх өттүттэн алдьархай ааҥнаан, Фрунзе нэһилиэгэр 8*13 м. иэннээх дьиэ уокка былдьанна.
МПЧ начальниктара уонна баһаартан сэрэхтээх буолуу инструктордара профилактическай үлэни тэрийэн, куттал суох буолуутун хааччыйар сыалтан тэрилтэлэргэ, чааһынай сектордарга, элбэх квартиралаах дьиэлэргэ уонна элбэх киһи мунньустар сирдэригэр инструктажтары, бэсиэдэлэри ыыталлар, ол курдук — уопсайа 7322 киһини хаппыттар. 1315 чааһынай дьиэҕэ, 205 элбэх квартиралаах дьиэ 408 квартиратыгар сылдьыбыттар. Баһаартан сэрэхтээх буолууга анаан 4947 памятка, листовка тарҕаппыттар.
Баһаартан сэрэхтээх буолуу режимин миэрэлэрин үөрэтиигэ 4044 киһиэхэ 38-та дьарык ыыппыттар (ол иһигэр 3299 саастарын ситэ илик оҕолорго, 745 улахан дьоҥҥо). Оҕо сайыҥҥы лааҕырдарыгар сылдьаннар профилактическай үлэни ыытыллар үлэни салгыыллар. Итини таһынан, ГИМС сотрудниктарын кытары ууга сэрэхтээх буолууга анаан холбоһуктаах рейдэлэри тэрийэллэр. Бу сыл саҕаланыаҕыттан араас тэрилтэлэри кытары холбоһуктаах 23 рейдэни тэрийбиттэр.
Нэһилиэнньэ киэҥ араҥатын хабар сыаллаах олорор дьиэлэргэ, квартираларга иһитиннэрэр-биллэрэр систиэмэни (АДПИ) туруорар туһалааҕын туһунан информацияны төһө кыалларынан тиэрдэллэр, дьиэлэринэн сылдьан өйдөтүү үлэтигэр рейдэлэри тэрийэн бэсиэдэлииллэр, памяткалары биэрэллэр. Ол курдук, «Предупреди пожар – установи АДПИ!» социальнай акция чэрчитинэн 2023 с. 25 устуука АДПИ туруоруллубут.
Семен Аргунов