Бүгүн, Саҥа сыл үүммүт 16-с күнүгэр, Нам улууһугар бастакы оҕо күн сирин көрдө. Нам улуустааҕы киин балыыһа оҕо төрүүр дьиэтиттэн иһитиннэрбиттэринэн, Бөтүҥ нэһилиэгиттэн Татьяна Рожина саҥа күн үүнүүтэ 00:36 мүн. кыыс оҕолонно. Кырачаан киһи ыйааһына – 4, 335 кг., уһуна – 56 см., туруктара этэҥҥэ.
Татьяна Гаврильевна уопсай гигиена, эпидемиолог быраас идэлээх. Кэргэнэ Иннокентий Иннокентьевич Рожин байыаннай сулууспалаах, ыстаарсай лейтенант, Белоруссияҕа байыаннай чааска рота командирын байыаннай-политическай үлэҕэ солбуйааччы дуоһунаһыгар үлэлиир.
Дьиэ кэргэн бу үһүс оҕолоро. Икки уолаттара — Денис уонна Дамир Бөтүҥ нэһилиэгин «Сардаана» оҕо уһуйаанын иитиллээччилэрэ. Улахан уол Денис орто «Сулусчаан», онтон Дамир кыралар «Күнчээн» бөлөхтөрүгэр сылдьаллар, кинилэр кырачаан балтыланнылар. Саха итэҕэлинэн, Иэйэхсит сылыгар сырдыгы, сылааһы бэлэхтээн, оҕо эбиллэн үөрүү үктэллэммит, кэскил кэрэһэлэммит, элбэх оҕолоохтор ахсааннарыгар киирбит дьиэ кэргэҥҥэ этэҥҥэ буолууну, дьолу-соргуну, быр-бааччы олоҕу баҕарабыт.
Касьян Олесов-Олук