Бүгүн Бүтүн Россияҕа Дьиэ кэргэн, таптал уонна бэриниилээх буолуу күнэ бэлиэтэнэр. 2022 сылтан бу бэлиэ күн государственнай бырааһынньык быһыытынан киирбитэ. Ити сыл бу туһунан ыйаахха дойду президенэ Владимир Путин бэс ыйын 28 күнүгэр илии баттаабыта.
«Дьиэ кэргэн – таптал, үтүө санаа уонна кыһамньы биһигэ. Бигэ туруктаах, дьоллоох дьиэ кэргэн модун уонна дьоллоох дойду бөҕө тирэҕинэн буолар. Ол иһин Россияҕа дьиэ кэргэни өйөөһүҥҥэ, оҕо төрөөһүнүгэр, дьиэ кэргэн олоҕун уйгутун тупсарыыга улахан болҕомто ууруллар», — диэн Ил Дархан Айсен Николаев этэн турар.
Бэлиэ күнүнэн Нам улууһугар «Бигэ туруктаах дьиэ кэргэн – норуот киэн туттуута» диэн үөрүүлээх тэрээһиҥҥэ 50 уонна 55 сыл бииргэ олорбут бастыҥтан бастыҥ дьиэ кэргэттэри, үтүө холобур буолар амарах аҕалары, истиҥ ийэлэри бэлиэтээтилэр:
Анатолий Романович уонна Зоя Романовна Платоновтар, Ленскэй нэһилиэк 4 оҕолоох олохтоохторо, бэс ыйын 26 күнүгэр 1974 сылтан ыал буолан олорбуттара 50 сыла.
Спиридон Николаевич уонна Евдокия Егоровна Канаевтар, 4 оҕолоох Хамаҕатта нэһилиэгин дьиэ кэргэнэ, 1969 сыл от ыйын 25 күнүттэн өйдөһөн-өйөһөн бииргэ олорбуттара 55 сыллара.
Дмитрий Михайлович уонна Екатерина Ильинична Елесеевтэр, Ленскэй нэһилиэк 4 оҕолоох дьиэ кэргэнэ, кулун тутар 28 күнүгэр 1973 сылтан бииргэ олорбуттара 51 сыла.
Василий Николаевич уонна Мария Васильевна Поповтар, 2 оҕолоох Ленскэй нэһилиэк дьиэ кэргэнэ, 1973 сыл от ыйын 17 күнүттэн ыал буолан олорбуттара 51 сыллара.
Иннокентий Иннокентьевич уонна Мария Дмитриевна Ивановтар, икки оҕону күн сирин көрдөрбүт Ленскэй нэһилиэк дьиэ кэргэнэ, 1973 сыл атырдьах ыйын 18 күнүттэн эн-мин дэһэн олорбуттара 51 сыла.
Валерий Васильевич уонна Августа Иннокентьевна Павловтар, түөрт оҕолоох Ленскэй нэһилиэк дьиэ кэргэнэ, 1973 сыл ахсынньы 12 күнүттэн ыал буолан бииргэ олорбуттара 51 сыла.
Иван Николаевич Лукинов уонна Мария Афанасьевна Павлова, үс оҕолоох Хатырык нэһилиэгин дьиэ кэргэнэ, 1964 сыл олунньу 10 күнүттэн ыал буолбуттара 60 сыла.
Петр Григорьевич уонна Ксения Николаевна Сергеевтэр, 5 оҕолоох 1 Хомустаах нэһилиэгин дьиэ кэргэнэ. 1961 сылтан балаҕан ыйын 27 күнүттэн ыал буолбуттара 63 сыла.
Дойдубутугар Дьиэ кэргэн, таптал уонна бэриниилээх буолуу күнүнэн «Нам улууһа» МТ баһылыга Юрий Слепцов улуус дьаһалтатын, депутаттар сэбиэттэрин ааттарыттан эҕэрдэтин тириэртэ, наҕараадалары туттартаата, дьиэ кэргэн үбүлүөйдээх сылларынан биир кэмнээх төлөбүрдэри анаталаата. Хамаҕатта нэһилиэгин баһылыга Евгений Ушницкай, Ленскэй нэһилиэк депуттарын сэбиэтин председателэ Егор Охлопков, 1 Хомустаах нэһилиэгин дьаһалтатын специалиһа Владислав Ушаков олохтоохторун эҕэрдэлээтилэр.
«Дьиэ кэргэн туруктаах, олоҕо-дьаһаҕа ситиһиилээх буоллаҕына – государствобыт сайдыылаах буолар диэн мээнэҕэ эппэттэр. Кэнники сылларга государство салалтатыттан дьиэ кэргэҥҥэ улахан болҕомто ууруллар буолла. Элбэх хайысхалаах көмөлөр олохтоннулар. Бу барыта олорор усулуобуйаны тупсарыыга, чөл, туруктаах олоххо туһаайар. Ил Дархан Айсен Николаев дьаһалларынан Саха сирин олохтоохторугар үгүс көмө баар буолла. Эһигинэн тумус туттабыт, холобур оҥостобут, инникигэ эрэллээхпит», — диэн Юрий Слепцов эҕэрдэтин эттэ.
Дьиэ кэргэн кыната – төрөппүт оҕото. Оҕолорбут сайдалларын, дьарыктаах буолалларын туһугар кэккэ нэһилиэктэргэ дьиэ кэргэн биригээдэтин тэрийэн үлэлээччилэр үгүстэр. Манна болҕомто ууран улуустан грант ананар буолбута.
«Нам улууһа» МТ баһылыга Юрий Слепцов 2024 сыл от ыйын 5 күнүнээҕи 174 №-дээх дьаһалынан, дьиэ кэргэн биригээдэтин тэринэн оҕолорго сайыҥҥы дьарыктарын тэрийиигэ Нам улууһун гранын кыайыылаахтарын биллэрдилэр. Ол курдук, 50 тыһ. солк. граны Модуттан Алквиад Протодьяконов салайааччылаах «Үчүгэй Алаас оҕолоро», Үөдэйтэн Екатерина Ядреева салайааччылаах «Тиэргэн», Хамаҕаттаттан Екатерина Заболоцкая салайааччылаах «Сайылык оҕолоро», Партизантан Сардана Хамаҕа кыыһа Харысхал салайааччылаах «Эрэл», 25 тыһ. солк. граны Көбөкөнтөн Надежда Бурнашева салайааччылаах «Будущий фермер» дьиэ кэргэн биригээдэлэрэ туттулар.
Дьиэ кэргэн туруктаах буолуутугар анаан олорор дьиэ атыылаһыытыгар, эбэтэр туттуутугар аналлаах социальнай төлөбүр туоһу суругун эдэр ыалга Тимур уонна Лилиана Марковтарга анаатылар.
Иллээх, бигэ туруктаах, чөл олохтоох дьиэ кэргэнтэн кэскиллээх ыччат иитиллэн тахсар. Өр кэмҥэ эйэ-дэмнээхтик олорбут, үлэни өрө туппут биир дойдулаахтарбытын Дьиэ кэргэн, таптал, бэриниилээх буолуу күнүнэн эҕэрдэлиибит! Алаһа дьиэҕитигэр ил-эйэ эрэ уйаланнын!
Семен Аргунов