Нам улууһугар бүгүн сарсыардаттан ойуур баһаарын буруота олохтоохтору долгутта.
Бүгүҥҥү туругунан улууспутугар ойуур баһаара суох. Бу кэлбит ойуур баһаарын буруота тыал хайысхатынан Уус Маайа оройуонуттан киирэр, — диэн улуустааҕы биир кэлим диспетчер сулууспата уонна «Якутлесресурс» ГАУ Намнааҕы филиала иһитиннэрдилэр. Тыаҕа сылдьааччылар, сир асчыттар, отчуттар аар тайҕабытын харыстаан уоту сэрэхтээхтик туттаргытын санатабыт.
СӨ экологияҕа, айылҕаны туһаныыга миниистирин солбуйааччы Андрей Коноплев: «Дьокуускайга тарҕаммыт буруо Хабаровскай кыраай, Амур уобалаһын уонна Уус Маайа оройуонун сиригэр-уотугар баар баһаардары кытта ситимнээх. Нэдиэлэ бүтүөр диэри буруолаах буолуоҕа», — диэн өрөспүүбүлүкэ иһитиннэрэр-көрдөрөр средстволарыгар эттэ.
Улууспут дьоно-сэргэтэ, буруоттан тыынар уорганы харыстанар тэриллэри ордук кырдьаҕастар, тыынар уорганнара эмсэҕэлиир уонна аллергиялаах дьон туһанаргытыгар сүбэлиибит.
Семен Аргунов