Нам улууһугар “Спортивные якутяне” Саха сирин үөрэнээччилэрин спартакиадата бэс ыйын 5-9 күннэригэр буолуоҕа. Ол курдук, сайын Эҥсиэли хочотугар 9 көрүҥҥэ 1500 кэриҥэ кыттааччы кэлэрэ сабаҕаланар.
“Быйылгы “Спортивные якутяне” спартакиада 29 көрүҥтэн турар. 20 көрүҥ өрөспүүбүлүкэҕэ бастыыр иһин күрэхтэһии быһыытынан ыытыллан, ыам ыйыгар түмүктэниэҕэ уонна хаалбыт 9 быһаарыылаах көрүҥ Намҥа буолуоҕа”, – диир спартакиада кылаабынай судьуйата Юрий Балаганскай.
Күрэхтэһээччилэр 2024 сыл саҕаланыаҕыттан греко-римскэй тустууга уонна чэпчэки атлетикаҕа (доруобуйаларынан хааччахтаахтар) көрсүбүттэр. Салгыы, бу нэдиэлэҕэ гиревой спорт уонна хабылык, хаамыска буолалаллара күүтүллэр.
Бэлиэтээн эттэххэ, гиревой спорт уонна волейбол сүүмэрдиир түһүмэхтэрдээх эбит. Гиирэ хас биирдии ыйааһыныгар 7 үчүгэй түмүгү көрдөрбүт гиревиктар Намҥа күрэхтэһэр быраабы ылыахтара. Оттон волейболистар кулун тутарга көрсүөхтэрэ уонна күрэхтэһииттэн талыллыбыт аҕыс хамаанда бастыҥы сайын Нам улууһугар быһаарыахтара.
Нам улууһугар спартакиада оскуола үөрэнээччилэрин финалга волейбол, ох саанан ытыы, көҥүл тустуу, бокс, дуобат, саахымат, гиревой спорт, чэпчэки атлетика, мас-рестлинг көрүҥнэрэ күүтэллэр.
4200-тэн тахса үөрэнээччилээх Нам улууһун сүүмэрдэммит хамаандата I бөлөххө киирэр. Бу бөлөххө Дьокуускай, Мииринэй, Нерюнгри, Алдан, Бүлүү, Ленскэй, Мэҥэ Хаҥалас, Нюрба, Хаҥалас, Сунтаар курдук күүстээх куораттар, улуустар бааллар.
2023 сыллаахха миэстэлэспит хамаандалар:
I бөлөх:
1 миэстэ – Дьокуускай;
2 миэстэ – Мэҥэ Хаҥалас;
3 миэстэ – Сунтаар;
4 миэстэ – 5 очукуонан хаалан Нам.
II бөлөх:
1 миэстэ – Уус Алдан;
2 миэстэ – Үөһээ Бүлүү;
3 миэстэ – Амма.
III бөлөх:
1 миэстэ – Кэбээйи;
2 миэстэ – Уус Майа;
3 миэстэ – Булуҥ.
IV бөлөх:
1 миэстэ – Эдьигээн;
2 миэстэ – Өлөөн;
3 миэстэ – Муома.