Бүгүн Нам улууһугар биир кэлим сахалыы иитэр-үөрэтэр, культурнай эйгэни тэрийэр торум чэрчитинэн, “Ийэ тылбыт дьылҕата. Ийэ куппут туруга. Ийэ сирбит кэскилэ” кэмпириэнсийэ М.К. Аммосов аатынан Култуура дыбарыаһыгар буола турар.
Төрүт тылга анаммыт тэрээһин пленарнай мунньаҕынан саҕаланна. Кэпсэтиигэ М.К. Аммосов аатынан ХИФУ профессора Галина Попова – Санаайа, М.К. Аммосов аатынан ХИФУ профессора, философия билимин дуоктара Андрей Саввинов, математика билимин дуоктара, өрөспүүбүлүкэтээҕи лицей дириэктэрэ Иван Шамаев, Сунтаар улууһун ытык киһитэ, СӨ култууратын үтүөлээх үлэһитэ, СӨ норуотун суруйааччыта Наталья Михалева – Сайа, “Ийэ тыл кэскилэ” өрөспүүбүлүкэтээҕи хамсааһын салайааччыта, тылы чинчийэр институт билим үлэһитэ Вилюяна Никитина, “Айгы ситимэ” сахалыы тыыннаах бырайыактары өйүүр уопсастыбаннай түмсүү салайааччыта Александр Протодьяконов, Нам улууһун баһылыга Юрий Слепцов, Намнааҕы култуура управлениетын салайааччыта Семен Ядрихинскай, улуус баһылыгын солбуйааччы Петр Абрамов кытыннылар.
Нам улууһун баһылыга Юрий Слепцов:
“Ийэ тылбыт дьылҕата. Ийэ куппут туруга. Ийэ сирбит кэскилэ” кэмпириэнсийэ улахан суолталаах тэрээһин буолар. Биһиги ыҥырыыбытын ылынан кэлбит убаастабыллаах ыалдьыттарбытыгар барҕа махтал буоллун. Бу кэмпириэнсийэ сахалыы иитэр-үөрэтэр, культурнай эйгэни тэрийэр сыаллаах ыытыллар уонна улахан түмүктэрдээх буолуо диэммин эрэнэбин.
Эбиэттэн киэһэ түһүлгэлэринэн кэпсэтиилэр, ырытыылар буолуохтара. Култуура дыбарыаһын көрөөччү саалатыгар “Ийэ куппут туруга” сахалыы эйгэни тэрийии түһүлгэтин Семен Ядрихинскай иилээн-саҕалаан ыытыаҕа.
“Ийэ тылбыт дьылҕата” иккис түһүлгэ Оҕо библиотекатын кэмпириэнсийэлиир саалатыгар ыытыллыаҕа. Бу түһүлгэҕэ уһуйааҥҥа, оскуолаҕа оҕону сайыннарар сахалыы эйгэни тэрийэр туһунан кэпсэтиэхтэрэ.
Үһүс түһүлгэ – “Ийэ сирбит кэскилэ” П.И. Сивцев аатынан история уонна этнография түмэлин кэмпириэнсийэлиир саалатыгар үлэлиэҕэ. Манна кэлбит дьон оҕону үлэнэн иитии, дьиэ кэргэн эйгэтигэр сахалыы тыыннаах оонньуулар туһунан кэпсэтиилэри истиэхтэрэ. Түһүлгэни “Нам улууһа” МТ дьиэ кэргэн уонна ыччат политикатын салаатын салайааччыта Екатерина Евстафьева иилээн-саҕалаан ыытыаҕа.
Наммыт олохтоохторо, төрүт тылбыт инники дьылҕатын туһугар долгуйар дьоммут-сэргэбит, Култуура дыбарыаһыгар кэлэҥҥит, сахалыы тыыннаах түһүлгэлэргэ кыттыһыҥ диэн ыҥырабыт.
Майя Федорова