СӨ Ил Дарханын уонна правительствотын дьаһалтата (АГиП) халаан уутуттан эмсэҕэлээбит Хатырык нэһилиэгиттэн КамАЗ массыынанан 10-тан тахса бырысыап бөҕү таһаарда.
“Ил Дархан Айсен Николаев сорудаҕынан министиэристибэлэр, үгүс тэрилтэлэр халаан уутуттан эмсэҕэлээбит нэһилиэнньэлээх пууннарга күүс-көмө буолаллар. Ол курдук, биһиги Хатырык нэһилиэгэр үлэлээтибит. Нэһилиэк Лена уонна Мир уулуссаларын бөхтөн-сыыстан ыраастаан босхолоотубут. Халаан уутун кэнниттэн дьон олорор сирэ, дьиэтэ-уота бөҕүнэн туолар, хоромньу үксүүр. Уустук кэмҥэ үлэһиттэрим баҕа санааларынан нэһилиэнньэҕэ күүс-көмө буолалларыгар махтанабын. Маннык субуотунньуктар салгыы атын нэһилиэнньэлээх пууннарга салҕаныахтара”, – диэн бэлиэтиир АГиП салайааччыта Георгий Михайлов.
Субуотунньук кэмигэр волонтердар дьон уһаайбатын, тиэргэнин хомуйдулар. Олохтоохтор көрдөһүүлэрин ылынан дьиэлэртэн миэбэллэри, малы-салы куурда таһаардылар. Нэһилиэк Лена уонна Мир уулуссаларын ыраастааһыныгар КамАЗ массыына 10-тан тахсата сырыы оҥордо.
Хатырык нэһилиэгэр министиэристибэлэртэн, ведомствалартан, өрөспүүбүлүкэ улуустарыттан уонна тэрилтэлэртэн үгүс волонтер хомуллан биир модун күүс буолан кэлэр. Сааскы халаан уутуттан эмсэҕэлээбит нэһилиэк нэдиэлэ бүтүүтэ хомуллан бүтүөхтээҕэр күүстээх былаан, сыал-сорук турар.
Санатан эттэххэ, СӨ Ил Дарханын укааһынан Саха сиригэр ыам ыйын 20 күнүттэн ыксаллаах быһыы-майгы биллэриллибитэ. СӨ Правительствотыгар ууга барбыт нэһилиэнньэлээх пууннар чөллөрүгэр түһэллэригэр бары миэрэни ылынарыгар сорудах турбута. Ол курдук, эмсэҕэлээбиттэргэ олорор усулуобуйаны тэрийии, нэһилиэнньэҕэ социальнай уонна материальнай көмөнү оҥоруу.
СӨ Ил Дарханын уонна Правительствотын дтаһалтатын пресс-сулууспата