Нам улууһун Үөрэҕин управлениетын оҕону иитиигэ уонна эбии үөрэхтээһиҥҥэ отделын кылаабынай специалиһа Инна Сивцева иһитиннэрбитинэн, Нам улууһугар 2-с сезоҥҥа уопсайа 9 лааҕыр үлэлии турар. Ол курдук: Үөдэйгэ, Хамаҕаттаҕа, 2 Хомустаахха, Маймаҕаҕа, Модукка, Аппааныга, Бөтүҥҥэ, Намҥа.
Үөдэй орто оскуолатын баазатыгар «Агент — 01» диэн орто саастаах оҕолорго күнүскү лааҕыр үлэлиир. Н.С. Тимофеев аатынан спортивнай оскуола баазатыгар Маймаҕаҕа «Албан», Намнааҕы оҕо спортивнай оскуолатын баазатыгар Бөтүҥҥэ «Эрэл», «Олимпик» оҕо эбии үөрэхтээһинин тэрилтэтин баазатыгар Хамаҕаттаҕа «Олимп», 2 Хомустаахха «Үнүгэс» лааҕырдар спортивнай хайысхалаахтар. Маныаха, 2 Хомустаах оскуолата агро хайысхалаах да буоллар, үлэни кытта спорду тэҥҥэ дьүөрэлиир.
Хамаҕатта саха-француз лицейин «Лингва», Аппааныга «Айар кут — Голливуд», Намнааҕы педколледж «Ай-Кут» диэн лааҕырдар айаро-тутар хайысхалаахтар. Биир сүрүн болҕомто анал байыаннай дьайыы кыттыылаахтарын оҕолоругар ууруллар. Ол курдук, байыастар оҕолоро сүрүннээн «Лингва» лааҕырга сынньаналлар. Модут агрооскуолатын баазатыгар «Чэчир» лааҕырга оҕолор оҕуруот олордуутугар үлэлииллэр, эмтээх оттору хомуйаллар.
Улуус үрдүнэн 2-с сезоҥҥа барыта 360-ча оҕо лааҕырынан хабыллынна.
Лена Ноговицына