Бу дьыл алтынньы 9-11 күннэригэр Нам улууһугар эдэр талааннары көрдүүр үөрэхтээһин экспедицията үлэлээтэ. Улуус үөрэҕин управлениета иһитиннэрэринэн, экспедиция СӨ Үүнэр көлүөнэтин тус сыаллаах фондатын күннэрин чэрчитинэн ыытыллыбыт. Тэрээһиҥҥэ генеральнай директор, Ил Түмэн депутата Владимир Егоров кыттыыны ылла. Барыта 1329 үөрэнээччи, 286 педагог уонна 53 төрөппүт кыттыыны ылбыт. Оробуочай бөлөҕү спортивнай резербэни бэлэмниир республикатааҕы киин директорын солбуйааччы Аграфена Колесова салайбыт.
Математика, физика, биология, химия предметтэригэр дьарыктар, бырайыактыыр-чинчийэр үөрэхтэр, музыкальнай инструменнарга оонньуулары истии, балет искусствотыгар көрүүлэр, уопсай физическэй бэлэм бэрэбиэркэтэ буолбуттар. Көҥүл тустууга, оҕунан ытыыга, мас-рестлиҥҥэ, буулдьанан ытыыга тренердэр маастар-кылаастары ыыппыттар. Ол түмүгэр талааннаах, ордук кыахтаах оҕолорго сүбэ-ама биэрбиттэр. Холобура, музыка үрдүкү оскуолатыгар, наука алын академиятыгар, Аксинья уонна Наталья Посельскаялар ааттарынан балет оскуолатыгар ыҥырыылар, уонунан оҕо спорт биирдиилээн көрүҥнэригэр республикатааҕы сбордарга мэктиэлэммиттэр.
Үс күн иһигэр экспедиция Хатырыкка, Аппааныга, Хамаҕаттаҕа Партизаҥҥа, Намҥа сылдьыбыт.
Бүтэһик күҥҥэ «Парк будущих поколений» эбии үөрэхтээһин профессиональнай тэрилтэтэ 2D персонажтары оҥорон, Го оонньууну ыытан көрдөрбүт, «ОйулукНАМ» оҕо инновационнай киинэ «Фабрика мультфильмов» диэн маастар-кылаас ыыппыт, фонда бирииһигэр түргэн саахымакка күрэхтээһии буолбут.
«Эльгауголь» хампаанньа өйөбүлүнэн «ОйулукНАМ»инновационнай киин аһыллыбыт, дрон-рейсиҥҥэ турнир ыытыллыбыт. «ОйулукНАМ» уонна дрон-рейсиҥҥэ турнир «Инносфера 2023» куонкурус кыайалаахтара буолаллар. Куонкурус Эльгауголь хампаанньа өйөбүлүнэн ыытыллыбыта.
Экспедиция үлэтин түмүгэр СӨ Үүнэр көлүөнэтин тус сыаллаах фондата уонна Нам улууһун дьаһалтата бииргэ үлэлииргэ сөбүлэһии түһэрсибиттэр.
Гимназия директора Александр Новгородов, Нам 2№ — дээх оскуола эбии үөрэхтээһинин педагога Ефросинья Федорова, Нам 1-кы №-дээх оскуолатын технологияҕа учуутала Максим Иванов СӨ Үүнэр көлүөнэтин тус сыаллаах фондатыттан махтал суругунан бэлиэтэммиттэр.
Лена Ноговицына