Намнааҕы поликлиника үлэ хаачыстыбатын, медицинскэй көмө оҥоруутун күүһүрдэн, оҕо стоматологиятын кабинетын арыйда. Оҕолор улахан дьонтон туһунан, бары ирдэбиллэргэ эппиэттиир, табыгастаах кабинекка эмтэниэхтээхтэр диэн поликлиника салалтата эрдэттэн былааннаабытын Намнааҕы киин балыыһа кылаабынай бырааһа Ариан Сергеев бигэргэтэр.
Нам улууһугар оҕо стоматологическай кабинета үөрүүлээх арыллыытыгар Дьокуускайдааҕы стомалогическай киин кылаабынай бырааһа Марина Пупелене, профессор, биир дойдулаахпыт Иннокентий Ушницкай, “Газпромбанк” бэрэстэбиитэлэ ыалдьыттаатылар.
Оҕо стоматолога Надежда Огонерова кабинеттанан саҥа аппараакка үлэлииригэр улахан өйөбүл, күүс-көмө буолбут “Газпромбанк” баан уу харчынан көмөлөспүтүн, Нам улууһугар Оҕо стоматологиятын кабинета республика улуустарыттан аан маҥнайгынан арыллыбытын биир дойдулаахпыт Иннокентий Ушницкай бэлиэтиир.
“Бүгүҥҥү күҥҥэ улууска аҕыс быраас үлэлиир: Хатырыкка, 1 Хомустаахха уонна алта Намҥа. Санатан эттэххэ, икки сыллааҕыта поликлиникаҕа икки стоматологическай кириэһилэ ылбыппыт, саҥа аппарааттар туруоруллубуттара. Ону тэҥэ, 2022 сыллаахха Доруобуйа харыстабылын министерствотын (Миндзрав) программатынан стоматологическай рентген аппараат ылыммыппыт.
Толуоннары нэһилиэнньэҕэ икки нэдиэлэ инниттэн биэриэхпитин баҕарабыт. Манна туһааннаах үлэлэр ыытыллаллар уонна кэлэр ыйтан саҕалыырга былаанныыбыт. Талоннары ылыы “Гослуслуги” приложение нөҥүө буолуоҕа”, – диир Ариан Николаевич.
Сардаана Свинобоева, стоматология отделын сэбиэдиссэйэ:
— Инникитин Оҕо кабинетыгар өссө биир быраас баар буоларын туруорсуохпут. Кабинет сарсыарда 9-13.00 чч. диэри биир оҕо тииһин 30 мүн. устата оҥоруоҕа. Оттон эбиэттэн киэһэ быраас көрүүтүнэн. Холобура, тиис оҥотторооччу иккистээн кэлбэтин туһуттан, кинини кытта уһун бириэмэҕэ үлэлээччилэр эбэтэр сорох ардыгар, хаттаан кэлээччилэр аныгыс сырыыларыгар 10 мүн. иһигэр оҥотторооччулар.
Харысхан Попов