Бүгүн Россия Ыксаллаах быһыыга-майгыга министрэ Александр Куренков Саха сиригэр үлэтин сырыытынан Ил Дархан Айсен Николаевы кытта Нам улууһун Хатырыгар сылдьан балаһыанньаны билистилэр.
Хатырыкка сылдьан халаан уутуттан эмсэҕэлээбит ыалларга, нэһилиэккэ бэлэмнэммит ПВР-га сырыттылар, тахсыбыт хоромньуну көрдүлэр. Онтон 10 оҕолоох Кутуковтар дьиэ кэргэттэригэр уонна Валентин, Тамара Васильевтарга сылдьан кэпсэттилэр.
Хаартыска: А. Сорокин
Хаартыска: А. Сорокин
Быстах кэмҥэ дьон олорор пуунугар үлэ хайдах салалларын билистэ. ПВР начальнига Павел Тимофеев бүгүҥҥү күҥҥэ уопсайа 154 киһи, ол иһиттэн 33 оҕо олорорун туһунан иһитиннэрдэ. Аһынан хааччыйыыны, олорор усулуобуйаны, ону таһынан гуманитарнай көмө туһунан билистилэр, дьон санаатын иһиттилэр.
«Ууга барбыт дьиэлээх дьоҥҥо хоромньуну быһаарар хамыыһыйалар сылдьан үлэлиэхтэрэ. Ол курдук, бастакы хамыыһыйа төһө сыаналаах баай-дуол эмсэҕэлээбитин быһаарыа, онтон балаһыанньаҕа уонна бэрээдэккэ олоҕуран көмө сууматын таһаарыахтара. Биһиги сүрүн сыалбыт эмсэҕэлээбит дьоҥҥо көмөлөһүү буолар», — диэн Александр Куренков эттэ.
Семен Аргунов