Саха өрөспүүбүлүкэтигэр кылаабынай федеральнай инспектора Евгений Корнеев Нам улууһугар оробуочай сырыытынан үлэлээтэ. Кинини кытары СӨ Правительствотын председателин бастакы солбуйааччы Дмитрий Садовников, тутуу, үөрэх, доруобуйа харыстабылын, экологияҕа, айылҕаны туһаныыга уонна ойуур хаһаайыстыбатыгар министерствотыттан сырыттылар.
Халаан уутуттан эмсэҕэлээбит тутуулар өрөмүөннэрин көрдүлэр. Ол курдук, Партизаҥҥа быраас амбулаториятыгар сырытта. Амбулатория уонна гериатрия отделениетын өрөмүөннүү сылдьаллар. Дьиэлэрэ толору эмсэҕэлээбит ыалга икки усулуобуйа турбута, дьиэ атыылаһыы эбэтэр саҥа дьиэни туттарыы. Ол чэрчитинэн, Аппааныга «Озернай» кварталга учаастак тыыраннар саҥа дьиэлэр тутулуннулар. Манна сылдьан дьиэ тутуутун хаачыстыбатын көрдүлэр, хаһаайыттары көрүстүлэр, тутааччылары кытары кэпсэттилэр. Хатырыкка улахан уу кэлэн улахан хоромньуну таһаарбыта. ДЕПО эргэ дьиэтэ урусхалланан өссө эбии хаарбах туруктанан, хамыыһыйа быһаарыытынан чөлүгэр түһэриллибэт буолбута. Онон саҥа баһаарынай чаас дьиэтэ тутуллан ахсынньы 12 күнүгэр үлэлэҕэ киирбитэ. Манна сылдьаннар тутууну, усулуобуйаны билистилэр. Саҥа тутулла турар Модут оскуолатыгар сырыттылар. Оскуола ис өттүгэр күүстээх үлэ бара турарын бэлиэтээтилэр.
Киэҥ ыҥырыылаах мунньах буолла. Тустаах министерствоттан кыттыыны ыллылар. Халаан уутуттан эмсэҕэлээбит дьоҥҥо федеральнай көмө үп күн бүгүн кэлэ илик. Кэлэр нэдиэлэ үлэ бүтэһик күннэрэ. Онон улахан болҕомто ууран үлэлэһэргэ эттилэр.
“Иэдээҥҥэ түбэспит дьону соҕотохтуу хаалларыахпыт суоҕа. Эрэннэриллибит толоруллар. Халаан уутуттан эмсэҕэлээбит социальнай хайысхалаах тэрилтэлэр өрөмүөннэригэр уонна дьиэ тутуутугар бэйэлэрин үптэринэн ылсыбыт бэдэрээтчиттэргэ махтанабын. Оросхуоккут толуйуллуоҕа”, — диэн СӨ кылаабынай федеральнай инспектора Евгений Корнеев эттэ.
Дмитрий Садовников, СӨ Правительствотын председателин бастакы солбуйааччы «Нам улууһун территориятыгар халаан уутун содулун туоратыыга, тутуулары чөлүгэр түһэриигэ күүстээх үлэ барбытын СӨ кылаабынай федеральнай инспектора Евгений Корнеев үчүгэйинэн сыаналаата. Ил Дархан Айсен Николаев күүскэ үлэлээн федеральнай таһымтан үп хамсаата. Ол эрэн кэккэ министерстволартан үп көрүллүбэтэ. Онон бэйэбит региоммут бюджетыттан таһаарар сыал-сорук турар. Кэлэр нэдиэлэҕэ тустаах дьоҥҥо көмө тиийиэҕэ диэн эрэнэбит».
Семен Аргунов