СӨ Ил Дархана Айсен Николаев сорудаҕынан, халаан содулун туоратыыга правительство бөлөҕө тэрилиннэ. Бөлөҕү СӨ правительствотын председателин бастакы солбуйааччы Дмитрий Садовников салайар. Бу туһунан СӨ Ил Дарханын уонна правительствотын пресс-сулууспата иһитиннэрэр.
Ыам ыйын 20 күнүгэр бөлөх чилиэннэрэ, министрдэр, халаантан улаханнык эмсэҕэлээбит Хатырык уонна Маймаҕа нэһилиэктэрин олохтоохторун кытта көрүстүлэр. Аһаҕас кэпсэтиигэ олохтоохтор ордук үп-харчы өттүнэн көмө боппуруоһун таарыйбыттар. Барыллаан ааҕыынан, халаан уутуттан 2 тыһ. тахса киһи эмсэҕэлээбит. Кинилэргэ биир кэмнээх харчынан көмө төлөнүөҕэ уонна баайдара-дуоллара эмсэҕэлээбитигэр көмө ылыахтара. Билиҥҥи туругунан, Нам улууһун үрдүнэн хоромньу 43 мөл. солк. тэҥнэспит. Олохтоохтор төлөбүр ыларга сайабылыанньаларын МФЦ-га, «Госуслуги» портал нөҥүө суруйан биэриэхтэрин сөп.
Үгүс ыйытыы тыа хаһаайыстыбатыгар киирдэ. Министр Артем Александров иһитиннэрбитинэн, барыллаан ааҕыынан 180 төбө ынах уонна 140 сылгы өлбүт. Бу сыыппара уларыйыан сөп. «Көмө балаһыанньата уонна бэрээдэгэ быһаарыллыаҕа. Оҕуруот аһыгар уонна аһылык базатыгар хоромньу улуус аграрийдарын көмөтүнэн уонна чугастааҕы улуустарынан толуйуллуоҕа«, – диэн министр чопчулаата.
Маны тэҥэ, олохтоохтор суол туругун оҥоһуутун ыйыталастылар. Онуоха СӨ суолун хаһаайыстыбатын уонна транспорын министрин солбуйааччыта Семен Коркин быһаарбытынан, улуус дьаһалтатын кытары алдьаныылар-кээһэниилэр ааҕыллан, комиссиянан бигэргэнэн акталар оҥоһуллаллар. Муниципальнай тэриллиилэргэ суол саахалын туоратар үлэлэргэ 100 мөл. солк. кэриҥэ үп бюджекка көрүллүбүт. Бу үлэлэри кылгас кэм иһигэр, ыам ыйыгар-бэс ыйыгар саҕалаан, от ыйыгар бүтэрэр курдук былаанныыллар. Бэдэрээтчит тэрилтэлэр үлэлииргэ бэлэмнэр. Халаан уута «Нам» өрөспүүбүлүкэтээҕи суолун 102, 109, 113 учаастактарыгар тахса сырытта. Ити кэмнэргэ суол сабыллыбыта. Билигин сырыы кыра уйуктаах массыыналарга сөргүтүлүннэ. Оттон улахан уйуктаах техника сырыытын асфальт суол туругун бэрэбиэркэтин кэнниттэн быһаарыы ылыллыаҕа.
Үгүс ыйытыы уот боппуруоһун таарыйда. Маймаҕа, Хатырык уонна Аппааны сорох сирдэринэн уота суох олороллор. Өскөтүн ыам ыйын 19 күнүн киэһээ 6 ч. туругунан 2,5 тыһ. киһи уота суох олорбут эбит буоллаҕына, бүгүн уота суох 280 киһи олорор. Уу түстэ даҕаны «Якутскэнерго» хампаанньа уонна киин электрическэй ситим биригээдэлэрэ өрөмүөн, сөргүтүү үлэтин ыытыахтара. СӨ ОДьКХ-тын уонна энергетикатын министрэ Вячеслав Емельянов бэлиэтээбитинэн, оттук сезонун уһатыыга муниципальнай тэриллиилэри кытары сайаапка оҥоруутун үлэтэ ыытыллар.
Хатырыкка эмчиттэр биригээдэлэрэ үлэлиир. ПВР-га медицинскэй пуун тэриллибит. СӨ доруобуйатын харыстабылын министрэ Лена Афанасьева иһитиннэрбитинэн, бүгүҥҥү күҥҥэ 90-тан тахса киһи көрдөрбүт. Итиэннэ бүгүн терапевтар, педиатрдар, медицинскэй психологтар кэлэллэрэ күүтүллэр. Олус көхтөөхтүк медицина катастрофатын киинэ үлэлиир. Биригээдэ иккис бөлөҕө Аппааныга баар. Ыам ыйын 21 күнүттэн 2 №-дээх өрөспүүбүлүкэтээҕи балыыһа уонна өрөспүүбүлүкэтээҕи мобильнай биригээдэ киинин специалистара кэлиэхтэрэ. Офтальмологтар, кардиологтар, невропатологтар биригээдэлэрин үлэтэ былааннанар. Чэпчэтиинэн туһанар араҥаҕа наадалаах эмп-томп тиэрдиллибит.
Бэлиэтээн эттэххэ, ыам ыйын 20 күнүттэн Саха сирин үрдүнэн ыксаллаах быһыы-майгы режимэ олохтонно. Ол туһунан Ыйаахха СӨ Ил Дархана Айсен Николаев бүгүн илии баттаата.
Лена Ноговицына
Хаартыска: А. Сорокин