Бүгүн Нам улууһугар РФ Президенин Илин Уһук федеральнай уокурук боломуочуйалаах бэрэстэбиитэлин аппаратыттан СӨ кылаабынай федеральнай инспектора Евгений Корнеев, СӨ Правительствотын председателин 1 солбуйааччы Дмитрий Садовников кыттыылаах правительственнай оробуочай бөлөх үлэлээтэ, сааскы халаан содулун чөлүгэр түһэрии үлэтин билистэ.
Оробуочай бөлөх кытыылаахтара “АЗС – Граф Биэрэгэ” бөҕөргөтүү даамбаны, халаан уутуттан эмсэҕэлээбит Граф Биэрэгэр “Ромашка” оҕо уһуйааныгар уонна Намнааҕы техникум уопсайдарыгар, үөрэнэр корпуһугар ыытыллар өрөмүөн үлэтин көрдүлэр. “Нам улууһа” МТ баһылыга Юрий Слепцов халаан уутун содулун туоратыыга ыытыллар чөлүгэр түһэрии үлэни сырдатта, сиһилии быһаарда.
Ол кэнниттэн Нам улууһун дьаһалтатын мунньахтыыр саалатыгар көһө сылдьар сүбэ мунньах ыытылынна. 2024 с. сааскы халаан уутуттан эмсэҕэлээбит эбийиэктэргэ ыытыллар үлэ уонна ууга ылларбыт дьоҥҥо төлөбүрү оҥоруу боппуруоһун дьүүллэстилэр. Сүрүн иһитиннэриини “Нам улууһа” МТ баһылыга Юрий Слепцов оҥордо. Кини быйылгы халаан уутуттан 13 нэһилиэк эмсэҕэлээбитин этэн туран, хоромньу барыта 1 млрд. 568 мөл. солк. тэҥнэспитин бэлиэтээтэ. СӨ экологияҕа, айылҕа харыстабылын министиэристибэтэ бигэргэппит испииһэгинэн халаантан эмсэҕэлээбит дьон ахсаана 5 467 киһиэхэ тиийбит. От ыйын 22 күнүнээҕи туругунан кинилэргэ барыта 247 мөл. 780 тыһ. солк. суумалаах үп расчетнай счеттарыгар ыытыллыбыт. Ол иһигэр, 3013 киһиэхэ 30 мөл. 131 тыһ. солк. суумалаах биир кэмнээх материальнай көмө оҥоһуллубут, 555 киһиэхэ бастакы наадалаах туттар малларын сорҕотун сүтэриилэрин иһин 27 мөл. 750 тыһ. солк. суумалаах харчынан көмө оҥоһуллубут, оттон 1899 киһи бастакы наадалаах туттар малларын толору сүтэриилэрин иһин 189 мөл. 900 тыһ. солк. суумалаах харчынан көмөнү ылбыттар.
Көһө сылдьар сүбэ мунньах ВКС нөҥүө ыытыллыбыт буолан, өрөспүүбүлүкэбит министиэристибэлэрин бэрэстэбиитэллэрэ кыттыыны ыллылар, хос иһитиннэриилэри оҥордулар. Халаан кыһалҕатын күргүөмүнэн туоратар хамсааһын тэриллэн, киэҥ далааһыннаах үлэ ыытылларын сырдаттылар. Дуоһунастаах үлэһиттэр киирбит ыйытыыларга хоруйдаатылар. Көһө сылдьар сүбэ мунньахха СӨ Правительствотын эппиэттээх үлэһиттэрин таһынан, Нам улууһун халаан уутуттан эмсэҕэлээбит нэһилиэктэрин баһылыктара, Нам оройуонун Прокуратуратын эппиэттээх үлэһиттэрэ, тэрилтэлэр салайааччылара кыттыыны ыллылар.
Сүбэ мунньах түмүгүнэн Дмитрий Садовников федеральнай таһымнаах ыксаллаах быһыы-майгы биллэриллэн, халаантан эмсэҕэлээһини чөлүгэр түһэрии үлэтин үгүс өттө федеральнай бюджеттан үбүлэнэрин уонна хоромньуну толуйууга киэҥ үлэ барарын бэлиэтээтэ.
Касьян Олесов-Олук