Бүгүн Нам улууһугар СӨ Правительствотын председателин бастакы солбуйааччыта Дмитрий Садовников үлэлиир.
Былаан быһыытынан Үөдэйгэ сылдьан халаан уутуттан көмүскүүр гидротехническай сооружениены көрүүттэн саҕалаата, төһө сөптөөх үлэ ыытыллыбытын көрдө-иһиттэ.
«Быйыл 21 мөл. 200 тыһ. солк. бөҕөргөтүү үлэтэ ыытылынна. Уопсайа 25 тыһ. куб хайа кумаҕа, ону таһынан 1200 куб кыырпахтаммыт таас кутулунна. Суол алдьаммытын-кээһэммитин чөлүгэр түһэриигэ, өрөмүөннүүргэ Үөдэй — Тоҥ Бас икки ардынааҕы суола, 1 Хомустаах — Үөдэй суолун Анньыспыт учаастага өрөмүөннэммитэ», — диэн капитальнай тутууга уонна архитектураҕа управлениетын начальнига Алексей Кондаков иһитиннэрдэ.
Бүгүн СѲ Правительствотын председателин бастакы солбуйааччыта Дмитрий Садовников Үөдэйгэ сылдьыбытын таһынан, 2 Хомустаахха уонна Арбыҥҥа сырытта. Кинини сэргэ СѲ Экологияҕа, айылҕаны туһаныыга уонна ойуур хаһаайыстыбатыгар министрин солбуйааччыта Эдуард Пихтин, СѲ Олох-дьаһах коммунальнай хаһаайыстыбатын министрин солбуйааччыта Наталия Готовцева сырыттылар.
2 Хомустаах үөһээ Сэргэлээххэ көһөр үлэтэ салгыы ыытыллар. Ол курдук, билигин аллараа нэһилиэккэ 39 дьиэҕэ 120 киһи олорор. Саҥа интернат тутуллуор диэри урукку дьаһалта дьиэтигэр оскуола интерната тэриллибит уонна ФАП баар. Сэргэлээххэ интернат уонна ФАП тутуллар миэстэлэрэ быһаарыллыбыт. Дьон көһөн тахсыытыгар киин ититии ситимин тардыы атахтыыр этэ. Онуоха билиҥҥи туругунан Сэргэлээххэ уһаайбалары барытын хабар гына ситими тардыы үлэтин ыыта сылдьаллар. Бу сырыы түмүгүнэн үлэни алтынньы 7 күнүгэр бүтэрэргэ диэн сыал-сорук туруорулунна.
Арбын нэһилиэгэ улахан халаан уутугар эмсэҕэлиир кутталлаах. Онон халаан уутуттан харыстанар обваловканы оҥоруу, бөҕөргөтүү үлэтин хайдах быһыылаахтык ыытары торумнастылар. Хатыыстаахха эргэрэн кутталлаах туруктаммыт муостаны көрдүлэр. Манна саҥа муоста тутуллара былааннанар.
Нам улууһун 1№-ээх баһаарынай чааһыгар учебнай теплодымкамера арыллыытын үөрүүлээх чааһа буолла.
Эҕэрдэ тыллары СӨ Правительствотын председателин бастакы солбуйааччы Дмитрий Садовников; Нам улууһун баһылыга Юрий Слепцов; Саха сирин нэһилиэнньэтин олоҕор-дьаһаҕар куттал суох буолуутугар государственнай комитет председателин бастакы солбуйааччы Айаал Вензель; “Государственная противопожарная служба РС(Я)” начальнига Руслан Босиков; Намнааҕы ОГПС начальнига Иван Винокуров эттилэр.
СӨ Правительствотын председателин бастакы солбуйааччы Дмитрий Садовников Намнааҕы ОГПС суоппарыгар Афанасий Матаннановка махтал сурук туттарда. Саха сирин нэһилиэнньэтин олоҕор-дьаһаҕар куттал суох буолуутугар государственнай комитет председателин бастакы солбуйааччы Айаал Вензель улуустааҕы баһаарынай сулууспа начальнигын Иван Винокурову, начальнигы солбуйааччы Николай Парникову наҕараадалаата. “Государственная противопожарная служба РС(Я)” начальнига Руслан Босиков Юрий Слепцову, Нам сэлиэнньэтин баһаарынай чаас начальнигын Семен Петрову, үлэһиттэри Федор Андреевы, Игнат Харитоновы наҕараадалаата.
Семен Аргунов