Атырдьах ыйын 15 күнүттэн Нам улууһун Модут нэһилиэгэр «Сибэкки биэрээри» диэн саҥа сахалыы киинэ уһуллуута саҕаланар. Бу туһунан «Саха сирэ» хаһыат сайтыгар суруйда. Киинэ сценарийа Семен Ермолаев «Эйиэхэ сибэкки биэрээри» айымньытыгар олоҕуран суруллубут. Киинэ режиссера Василий Слепцов бырайыак туһунан кэпсиир.
«Сибэкки биэрээри» киинэ Василий Слепцов трагикомедия жанрыгар уһулар бастакы полнометражнай киинэтэ буолар. Бу иннинэ кини икки кылгас киинэлэри устубута биллэр: «Маринад» уонна «Линия». Бэлиэтээн эттэххэ, саха режиссердара драматургическай айымньыларга олоҕуран киинэлэри үлүһүйэн уһулбаттар, онон инникитин хайдах киинэ буолан тахсара өссө бүк күүтүүлээх буолар.
– Биһиги киинэ продюсера Алексей Михайловы кытта ханнык айымньыны эбэтэр устуоруйаны киэҥ экрааҥҥа таһаарар туһунан өр толкуйдаабыппыт. Араас сценаристарга тахсыбыппыт, сюжеттары көрдөөбүппүт. Ол кэннэ биһиэхэ сценарист Алексей Амбросьев «Эйиэхэ сибэкки биэрээри» айымньыны ааҕарга этии киллэрбитэ. Оччолорго А.С. Пушкин аатынан Национальнай библиотекаҕа кинигэни булан аахпытым уонна олус сөбүлээбитим. Продюсер эмиэ бу айымньыны сөбүлээн, киинэ уһуларга быһаарыы ылыммыппыт. Бу айымньы тыа сирин олоҕун туһунан кэпсиир, — диэн Василий Слепцов эттэ.
Инникитин режиссер Василий Слепцов бу киинэнэн араас бэстибээллэргэ кыттары былаанныыр. Киинэҕэ тыа сирин үс доҕордуу эр дьон олохторун туһунан кэпсэнэр. Бааска, Саша уонна Петя сценарий быһыытынан эргэ дэриэбинэ кулуубугар көрсөллөр уонна ааспыт кэмнэрин саныыллар.
Хаартыскалар: Соц. ситимтэн