Нам улууһун Хатырыгар М.К. Аммосов аатынан өрөспүүбүлүкэтээҕи судаарыстыбаннай история музейыгар атырдьах ыйын 10 күнүгэр “Славная дочь якутского народа: 120 лет со дня рождения С.П. Сидоровой” кинигэ быыстапката аһыллыахтааҕын туһунан СӨ Ил Дарханын уонна Правительствотын пресс-сулууспата иһитиннэрэр.
Быыстапкаҕа турбут кинигэлэр биир дойдулаахпыт, өрөспүүбүлүкэ уһулуччулаах судаарыстыбаннай, политическай уонна общественнай деятелэ, СССР I уонна II ыҥырыылаах Үрдүкү Сэбиэтин депутата, АССР Үрдүкү Сэбиэтин Президиумун председателэ София Сидорова олоҕун кэпсиэҕэ, ойуулуоҕа.
Тэрийээччилэр Софья Петровна олоҕун билиһиннэрэллэр уонна күүстээх, ыарахан үлэттэн саҕалаабытын туһунан бэлиэтииллэр. Ол курдук, Софья Сидорова дьиэ үлэһититтэн бүтүн дойдуга биллэр деятелгэ тиийэ үрдээбит. Кини олорбут чаҕылхай олоҕо биһиэхэ холобур буолар: дойдуга таптал, үрдүк сорукка эппиэтинэстээхтик сыһыаннаһыы, бэриниилээхтик толоруу.
Наталья Малышева “Руководители Якутии” кинигэтигэр, ааптар Софья Петровна өрөспүүбүлүкэ социальнай-экономическай сайдыытыгар сүрүн оруоллааҕын киэҥник арыйбыт. Ону тэҥэ, “Выдающиеся люди республики” серияҕа таһаарыллыбыт “Софья Сидорова: к 100-летию со дня рождения” кинигэни оҥорооччулартан биирдэстэрэ Айталина Захарова музейга бэлэхтээбит. Кинигэ Саха сирин уһулуччулаах кыыһа олохтооҕу суолун арылхайдык кэпсиир.
Быыстапкаҕа дьахтар хамсааһыныгар, Саха сирин дьахталларын съеһигэр, РФ Президенин иһинэн үлэлиир СӨ Бастайааннай Представительствотын историятыгар уонна Аҕа дойду Улуу сэриитин кэмигэр Саха сирин историятыгар анаммыт, олоҕурбут таһаарыылар туруохтара.
Быыстапка Хатырыкка атырдьах ыйын 10 күнүттэн балаҕан ыйын 10 күнүгэр диэри туруоҕа.
«Эҥсиэли» хаһыат