Кулун тутар 15, 16, 17 күннэригэр Российскай Федерация президенин быыбара ыытыллыаҕа. Ол чэрчитинэн бүгүн М.К. Аммосов аатынан култуура уонна духуобунай сайдыы дыбарыаһыгар Нам улууһун быыбардыыр учаастагын хамыыһыйаларын председателлэригэр уонна чилиэннэригэр семинар буола турар.
Үөрэтэр, иһитиннэрэр семинары СӨ Киин быыбардыыр хамыыһыйатын председателин солбуйааччы Иван Андросов иилээн-саҕалаан ыытар. Бүгүн күн устата быыбар хампаанньатыгар үлэлээччилэргэ саҥа уларыйыылары, тэрээһин өттүн о.д.а. кэпсиэхтэрэ.
Антонина Корнилова, Намнааҕы территориальнай быыбардыыр хамыыһыйа председателин солбуйааччы:
— Российскай Федерация президенин быыбардыыр хамыыһыйатын хампаанньата 2023 сыл ахсынньытыттан үлэтин саҕалаабыта. Нам улууһугар 2023 сыл бэс ыйын 1 күнүнээҕи дааннайынан 15 998 быыбардааччы баар. Билигин маны чуолкайдыыр үлэни ыыта сылдьабыт. Улууспутугар 27 УИК баар, территориальнай хамыыһыйа председателэ Николай Парников. Хамыыһыйаларга 7 эбэтэр 5 киһи үлэлиир, уопсайа 176 чилиэн баар. Улахан суолталаах быыбар буоларынан сибээстээн үлэһиттэр дьиэнэн сылдьан өйдөтөр, сырдатар үлэни ыытан саҕалаатылар.
Санаттахха, быйыл дойду президенин быыбара 8-с төгүлүн ыытыллар. Онно түөрт киһи кыттар: Владислав Андреевич Даванков («Саҥа дьон»); Владимир Владимирович Путин (бэйэтэ турааччы); Леонид Эдуардович Слуцкай (ЛДПР); Николай Михайлович Харитонов (КПРФ).
Семен Аргунов