Нам улууһугар ыттары тутар саҥа приют аһылынна

Нам сэлиэнньэтигэр көрүүтэ-истиитэ суох сылдьар ыттары тутар 80 миэстэлээх приют үлэлээн саҕалыаҕа. Ол курдук, Саха сиригэр толору ирдэбилгэ эппиэттиир аан маҥнайгынан тутуллубут приюту Василий Крымков салайыаҕа.

“Приют дьиэтэ үлэтин 100 бырыһыан толороругар баҕа санаабын этэбин. Улууспут баһылыгар Слепцов Юрий Иннокентьевичка барҕа махталбытын этэбит.

Ыт мэнээктээһинин тохтотуу, тутуу-хабыы, бэрээдэктиир үлэ салҕанар. Ол да буоллар, ыт айылҕа оҕото буоларынан, биһиги дьоннор айылҕа оҕотугар эмиэ оннук сиэрдээх сыһыаны биэриэхтээхпитин умнумуохха”, – диир Ленскэй нэһилиэк баһылыга Петр Сокольников.

Ыты тутар приют олоххо киириитэ улуус таһымыгар сытыытык туран быһаарыллыбыта этиллэр. Ол курдук, боппуруоһу быһаарарга кыһыннары Арсений Соловьев салайааччылаах “Газбойлер” ХЭТ тутан олоххо киллэрдэ. Онуоха, өрөспүүбүлүкэҕэ маннык приют маҥнайгынан тутуллан киирбитинэн, номнуо икки улуус Горнай уонна Уус Алдан олохтоох дьаһалталара интэриэһэргээн, көрөн-истэн барбыттар.

Улуус үс улахан нэһилиэктэригэр бэйдиэ сылдьар ыттары бэрээдэктиир үлэҕэ Василий Крымков бөлөҕө улахан кыһалҕаны быһаарарын Петр Сокольников бэлиэтиир. Уулуссаҕа ыт ахсаана аҕыйыырыгар тохтоло суох сааһылыыр Василий Яковлевич үтүө суобастаахтык, сокуон өттүнэн кэһиилэри таһаарбакка үлэлиирин ветеринария үлэһиттэрэ бигэргэтэллэр.

Харысхан Попов