Бүгүн Хатыҥ Арыы нэһилиэгин Аппаанытыгар «Жилье и городская среда» национальнай бырайыак чэрчитинэн, «Хаарбах туруктаах дьиэттэн дьону көһөрүү» программанан сылаас, сырдык, аныгылыы тутуулаах, толору хааччыллыылаах 12 квартиралаах дьиэ күлүүстэрин хаһаайыттарыгар туттартыыр үөрүүлээх тэрээһин буолла.
«Класс энергетической эффективности В (высокий)» диэн мэктиэлээх, 3 мэндиэмэннээх элбэх квартиралаах дьиэни Алексей Пинигин директордаах «Прогресс» ХЭТ тутан үлэҕэ киллэрдэ. Дьиэ таһыгар оҕолорго оонньуур, сынньанар былаһаакка туруорбуттар.
Саҥа дьиэ тутуутун үлэтэ түмүктэммитинэн, хаһаайыттар саҥа квартираламмыттарын айхаллаан, айыыларга сүгүрүйэн, аал уоту айах тутан Алексей Кривогорницын алгыс сиэрин-туомун толорбутун кэнниттэн, үгэс быһыытынан «Нам улууһа» МТ баһылыгын э.т. Анатолий Павлов, «Хатыҥ Арыы нэһилиэгэ» МТ баһылыга Иван Ноговицын, «Прогресс» ХЭТ директора Алексей Пинигин уонна кырачаан олохтоох Ариан Петухов аалай лиэнтэни быстылар.
Ыҥырыылаах ыалдьыттар уонна дьиэни туппут тэрилтэ директора хаһаайыттары эҕэрдэлээтилэр, нус-хас олоҕу, бары биир дьиэ кэргэн курдук дьиэ тас өттүттэн саҕалаан харыстабыллаахтык сыһыаннаһан көрө-истэ сылдьалларыгар баҕардылар. Дьиэ тутуутугар үлэлэспит дьоҥҥо махтал тылларын эттилэр. Алексей Пинигин тэрилтэтин аатыттан, саҥа дьиэҕэ киирэр үөрүүлээх түгэнинэн элбэх оҕолоох Таисия, Борис Чупровтарга телевизор бэлэхтээтэ.
«Федеральнай уонна өрөспүүбүлүкэтээҕи программанан маннык үлэ ыытыллыбыта балай эмэ ыраатта. Биһиги дойдубут салалтатыгар, Ил Дархаммытыгар Айсен Николаевка, правительствоҕа маннык программалар олоххо киирэн тыа сирин олохтоохторун олоҕун, олорор усулуобуйаларын тупсаралларыгар махтаныах тустаахпыт», — диэн Анатолий Павлов санаатын тириэртэ.
«Дойдубут президенигэр Владимир Путиҥҥа, Ил Дархаммытыгар Айсен Николаевка, улууспут баһылыгар Юрий Слепцовка, нэһилиэкпит баһылыгар Иван Ноговицыҥҥа, дьаһалта специалистарыгар, тутуу үлэһиттэригэр улахан махталбытын тиэрдэбит. Бу дьиэ сылаас, үрдүк хаачыстыбалаах буоларыгар эрэнэбит. Олохтоохтор ыраастык, эйэлээхтик-иллэхтик олоруохпут диэн эрэннэрэбит», — диэн саҥа дьиэ олохтоохторун аатыттан Марфа Евсеева харда тылы эттэ.
Семен Аргунов