Кремль Екатерининскай саалатыгар РФ президенин администрациятын салайааччытын бастакы солбуйааччыта Сергей Кириенко олохтоох бэйэни салайыныы сайдыытыгар кылааттарын иһин судаарыстыбаннай наҕараадалары туттартаата.
Ол курдук, «Заслуженный работник местного самоуправления РФ» бочуоттаах бэлиэни Нам улууһун баһылыга Юрий Слепцов тутта. Санатар буоллахха, «О награждении государственными наградами РФ» диэн туһааннаах ыйаахха дойду президенэ Владимир Путин бу дьыл муус устарыгар илии баттаабыта. Юрий Иннокентьевиһы кытта үрдүк ааты-суолу Нерюнгри улууһун баһылыгын бастакы солбуйааччыта Светлана Пиляй ылла. Кинилэр иккиэн бу наҕарааданы Саха сириттэн бастакынан туттулар.
Туһааннаах наҕараада хаһаайынын булбутунан биһиги улууспут баһылыгын Юрий Иннокентьевиһы эҕэрдэлиибит! Бу сыллар тухары кини нэһилиэк баһылыгыттан саҕалаан үгүс сайдыыга туһуламмыт үлэни-хамнаһы ыытан кэллэ. Олортон ахтар буоллахха, холобура, 455 учаастактаах Озернай кыбаартал кини тус көҕүлээһининэн тэриллибитэ. Хатыҥ Арыыга саҥа таас оскуола, 3 детсад, уһулуччулаах государственнай уонна политическай деятель Илья Егорович Винокуров аатынан музей, Граф Биэрэгэр «Алроса» олорор кыбаартал, Кыһыл Дэриэбинэҕэ элбэх өҥөнү оҥорор культура киинэ, биэрэги бөҕөргөтөр даамба, муосталаах суол уо.д.а. туттарбыта.
2018 сыллаахха Юрий Иннокентьевич Нам улууһун баһылыгынан талыллыбыта, онтон 2023 сыл балаҕан ыйыгар 92% куолаһы ылан баһылыгынан иккистээн быыбардаммыта. Кэнники биэс сылга Нам улууһугар 8 детсад, Хамаҕаттаҕа оскуола, Нам с. культура уонна духуобунай сайдыы дыбарыаһа, Аппааныга «Чороон» норуот айымньытын киинэ, Хатырыкка, Маймаҕаҕа, Фрунзеҕа, 2 Хомустаахха культурнай-спортивнай кииннэр, Салбаҥҥа спортсаала, Намҥа кырдьаҕастар уонна инбэлииттэр интернат-дьиэлэрэ, Салбаҥҥа, Бөтүҥҥэ ФАП-тар, Аппааныга амбулатория, 4 нэһилиэккэ оскуолалар өрөмүөннэннилэр.
Билигин Нам сэлиэнньэтигэр уонна Модукка оскуолалар тутулла тураллар. Намҥа спорт национальнай көрүҥнэригэр спортсаала, Таастаахха культурнай-спортивнай комплекс, Нам с. саҥа балыыһа, итиэннэ «Хаарбах туруктаах дьиэттэн дьону көһөрүү» программа ситиһиилээхтик олоххо киирэр. 2018-2032 сс. Нам улууһун социальнай-экономическай сайдыытын программата культура, тыа хаһаайыстыбата, спорт, урбаан, социальнай харалта уо.д.а. эйгэлэргэ туһуланан үлэлиир.
Дьоҥҥо-сэргэҕэ саамай чугас былаас уорганыгар, олохтоох бэйэни салайыныы үлэһиттэригэр, тустаах наҕараада иҥэриитин олохтуур туһунан эрдэ мунициапльнай түмсүүлэр бэрэстэбиитэллэрэ этии киллэрбиттэрэ. Бу этиини дойду президенэ Владимир Путин өйөөбүтэ. Бочуоттаах ааты-суолу бастакынан 188 киһи ылла. Кинилэр истэригэр биһиги баһылыкпыт уонна Светлана Пиляй бааллар.
«Заслуженный работник местного самоуправления РФ» бочуоттаах бэлиэ олохтоох бэйэни салайыныы уорганын үлэһиттэригэр үрдүк профессиональнай хаачыстыбаларын, салаа сайдыытыгар тус кылааттарын, нэһилиэнньэ уонна муниципальнай тэриллии олохторун тупсарыы, судаарыстыбаннай боломуочуйаны олоххо киллэрии уо.д.а. ситиһиилэрин, ону тэҥэ, бу эйгэҕэ 20-тэн итэҕэһэ суох үлэ ыстааһын иһин иҥэриллэр. Бу туһунан СӨ Ил Дарханын уонна правительствотын пресс-сулууспата иһитиннэрдэ.
Лена Ноговицына