Мария Бугаева председателлээх Хатыҥ Арыы нэһилиэгин Аппаанытааҕы 342 №-дээх быыбардыыр учаастак 6 үлэһиттээх хамыыһыйа үлэтин бириэмэтигэр саҕалаата. Быыбардыыр учаастак аһыллаатын кытары улууһун дьонугар холобур буолан, биир бастакынан «Нам улууһа» МТ баһылыга Юрий Слепцов, «Хатыҥ Арыы нэһилиэгэ» МТ баһылыга Иван Ноговицын быыбардаатылар.
Территориальнай быыбардыыр хамыыһыйа испииһэгинэн нэһилиэккэ 1311 быыбардааччы баар. Ол иһиттэн атын сиргэ быыбардыырга 109 киһи сайабылыанньа түһэрбит, оттон бу учаастакка 36 киһи быыбардыырын биллэрбит. Онон испииһэк кулун тутар 14 күнүгэр киэһэ 6 чааска 1238 быыбардааччынан бигэргэммит. Быйылгы сылга сокуоннай саастарын туолан 23 эдэр быыбардааччы баар буолбут.
Дойдубут Президенин быыбардыырга сарсыарда 8 чаастан учаастакка олохтоохтор гражданскай иэстэрин толорон быыстала суох кэлэллэр. Сахабыт норуотун култууратын өрө тутан сахалыы таҥастаах кэлээччи үгүс.
Семен Аргунов