М.К. Аммосов аатынан култуура дыбарыаһыгар улуус киэн туттар бастыҥтан бастыҥ спортсменнары чиэстиир тэрээһин буолла.
Нам улууһун спортсменнара аан дойду таһымыгар тиийэ чаҕылхай ситиһиилэнэн кэлбиттэрэ. Ол курдук, мадьынылар Анатолий Гладков, Сергей Константинов, бөҕөс Александр Румин ааттара биһиги улууспутугар үрдүккэ тураллар.
«Күүстээхтэн күүстээх, бастыҥтан бастыҥ спортсменнар кэлэ турдуннар, Нам улууһуттан тахса турдуннар», — диир улуус баһылыга Юрий Слепцов.
2024 сыллаахха Нам улууһун спорка кыахтаахтара спорт кыһыҥҥы көрүҥнэригэр Саха сирин V спартакиадатыгар 2-с миэстэ буолбута. Оҕолорбут «Спортивные Якутяне» спартакиадаҕа бары улуус иннигэр буолан Дьокуускай куорат кэнниттэн кэлэн оҕолорго спорт ханнык таһымҥа турарын көрдөрбүттэрэ. VIII-с төгүлүн ыытыллыбыт норуоттар икки ардыларынааҕы «Азия оҕолоро» оонньууга улууска хаһааҥҥытааҕар да ситиһиллибэтэх ситиһиини аҕалбыттара элбэҕи этэр.
Быйыл Нам улууһугар спорт буолбатах көстүү тахсыбытын бэлиэтиир наада. Ол курдук, нэһилиэктэр икки ардыларыгар ыытыллар комплекснай спартакиада үс түһүмэхтээх этэ. Төрдүс түһүмэҕи көрүҥнэр федерациялара тэрийбиттэрэ. Бу хамсааһын гиирэ спордугар, чэпчэки атлетикаҕа уонна мас-рестлиҥҥэ үтүө түмүгү биэрбитин улуустааҕы спорт управлениетын салайааччыта Павел Иванов чопчулаата. Ону тэҥэ, 2025 сылтан нэһилиэктэргэ түөлбэлэр спорка кыттыһалларын, дьарыктаналларын, күрэхтэһэллэрин ситиһии буолуоҕа.
«Бастыҥтан бастыҥнар» тэрээһиҥҥэ улууспутугар киэн туттар оҕолорго 10, улахан дьоҥҥо 10 бастыҥ, доруобуйаларынан хааччахтаах ситиһиилээх, үрдүгү дабайбыт спортсменнар, Нам улууһун эрэллэрэ ааттаннылар.
Спорт эйгэтин бары хайысхатыгар күүстэрин ууран бэриниилээх үлэлэрин иһин «Бастыҥтан бастыҥнар» ааттаннылар.
«Бастыҥтан бастыҥ» тэрээһиҥҥэ улууспут ситиһиилээх оҕолоро наҕараадаланнылар. 2025 сылтан Оҕо спордугар өссө күүстээх үлэ ууруллуоҕар этиллэр. 2024 сыл устата оскуолалар, нэһилиэктэр икки ардыларыгар ыытыллыбыт спартакиада кыайыылаахтара ааттаннылар.
Харысхан Попов