Алтынньы 15 күнүттэн сэтинньи 15 күнүгэр диэри бүтүн дойдубут үрдүнэн «Белая трость» диэн акция ыытылла турар.
И. Егоров-Горнай аатынан республикатааҕы көрбөттөргө аналлаах библиотека көҕүлээһининэн, “Мир един” диэн оскуола оҕолоругар, устудьуоннарга медиа-уруоктары республика библиотекалара тэрийэн ыыттылар. Маннык уруоктар көрбөт дьон кыһалҕаларыгар болҕомто ууруллара наадатын санатар, биһиги ортобутугар доруобуйаларынан хааччахтаах дьоҥҥо аһыныгас, амарах санаалаах буолууну иитиигэ туһуланар.
Нам улууһун библиотекалара бу үтүө санаа акциятыгар көхтөөхтүк кытыннылар. Н.М. Рыкунов аатынан киин библиотека уонна 12 нэһилиэк библиотекалара 183 оскуола үөрэнээччилэрин уонна Намнааҕы техникум устудьуоннарын ортолоругар уруоктары ыыттылар. Киин библиотекаҕа ыытыллыбыт уруоктарга Нам улууһун көрбөттөр обществоларын салайааччыта А.Н. Соловьев үлэтин-хамнаһын билиһиннэрдэ уонна аһаҕас кэпсэтии ыытта.
Уруок кэмигэр оҕолор көрбөттөргө аналлаах ханнык анал библиотекалар баалларын, Брайль ньыматынан ааҕыы уонна суруйуу, “тифлокомментирование”, “саҥарар кинигэ” туһунан билистилэр. Салгыы “Аптаах алта туочука” диэн оонньууга Брайль алфавитынан аан дойдуга биллибит мөлтөхтүк эбэтэр харахтарынан көрбөт дьон ааттарын таайдылар, “Снайпер саха” киинэттэн быһа тардыыны тифлокомментарийдаах көрдүлэр.
Уруок түмүгүнэн оҕолор элбэх саҥаны билбиттэрин, доруобуйаларынан хааччахтаах дьоҥҥо ураты болҕомтолоох сыһыан наадатын туһунан санааларын үллэһиннилэр. Аахсыйа кыттыылаахтара туоһу сурук туттулар.
Раиса Гоголева