Нам улууһугар улуус уонна нэһилиэктэр депутаттарын XI Спартакиадата буолбута иккис күнэ. Бүгүн кулун тутар 3 күнүгэр XI ыытыллар Спартакиадата үөрүүлээх аһыллыыта Хамаҕаттаҕа Н.П. Габышев аатынан «Эрчим» спорт саалаҕа буолла.
Спартакиада маҥнайгы күнүгэр депутаттар волейболга Илья Винокуров аатынан Намнааҕы педагогическай колледж, Ефим Шапошников аатынан Хамаҕатта орто оскуолатын саалаларыгар оонньообуттара, төрүт ох саанан ытыыга Хамаҕаттаҕа, буулдьанан ытыыга Култуурнай-спорт комплекска күрэхтэспиттэрэ.
Билиҥҥитэ буулдьанан ытыыга улахан нэһилиэктэргэ Ленскэй нэһилиэк бастакы (148 очко), иккис – улуустааҕы депутаттар сэбиэтэ (145), үһүс – 1 Хомустаах (117). Оттон кыраларга кыайыыны Искра сурунар (115). Иккис – Арбын (112), үһүс – Никольскай (92).
Төрүт ох саанан ытыыга. Бастакы – Ленскэй, иккис – Хамаҕатта, үһүс – Партизан. Кыраларга бастакы – Арбын, иккис – Түбэ, үһүс – Салбаҥ.
Бүгүн улуус уонна улахан нэһилиэктэр депутаттара волейболга кыайыылааҕы быһаарар оонньууга көрүстүлэр. Ону тэҥэ, Спартакиада дартс, баскетбол мээчигин корзинаҕа быраҕыы, көрүҥнэринэн салҕанна.
Волейболга кыра нэһилиэктэр миэстэлэрэ биллибитинэн, кыайыы Түбэ хамаандатыгар, иккис – Арбын, үһүс – Салбаҥ. Оттон улахаттарга 3 миэстэ иһин улуустааҕы депутаттар сэбиэтэ уонна Партизан депутаттара көрөөччүлэргэ уоттаах-күөстээх “абытайдаах” оонньууну бэлэхтээбиттэрин киһи хайгыы эрэ этэр. Партизан баһылыга Алексей Зырянов бүгүн улуустар ыксаппыттарын бигэргэтэр. Оттон 1 Хомустаах Үөдэй хамаандатын эрэллээхтик 2:0 кыайан волейболга тэҥнээҕин булбата.
“Бэҕэһээ улуус депутаттарын 11-23 очко кыайан иһэммит ситтэрбиппит, кыһыылаахтык хотторбуппут”, – диир баһылык Алексей Зырянов.
Дартс көрүҥэр кыра нэһилиэктэргэ 316 очкону ылан Салбаҥ нэһилиэгин депутаттара инники таҕыстылар, кинилэр кэннилэриттэн 230 очколаах Искра, онтон 224 очкону ылбыт Никольскай хамаандата. Кыра нэһилиэктэр дартска бары үчүгэйдик быраҕаллара бэлиэтэнэр.
Улахаттарга, дартс дротигын бастыҥ быраҕааччыларынан ааттанар – 452 очко ылбыт Ленскэй нэһилиэк. 444 очколаах Үөдэй иккискэ тахсар уонна 426 очкону ылбыт 1 Хомустаах үһүс буолар.
Баскетбол мээчигин корзинаҕа быраҕыыга, мээчиги баһылаабыт Үөдэй 15 очкону ылан кыайыылаах таҕыста. Оттон былырыын 12 очколаах Партизан көрдөрүүтүн тупсарбыт, 14-дү ылла. Үһүскэ 14 очколаах 1 Хомустаах таҕыста. Бу сырыыга улахан нэһилиэктэр бары кэриэтэ 10-ан итэҕэһэ суох очкону ылбыттарын этэр тоҕоостоох.
Дьоҕустарга бастакы миэстэ – 5 очколаах Салбаҥ, иккис – 5 очколаах Түбэ, үһүс – 5 очколаах Арбын.
Уопсай түмүк көрдөрөр, биэс көрүҥҥэ ортону тутуспут Үөдэй депутаттара Ленскэй нэһилиэги 1 очконан куоһаран улахан нэһилиэктэргэ кыайыы үрдүк аатын ыллылар. Үөдэйдэр волейболга 2, мээчиги быраҕыыга 1, дартска 2, буулдьанан ытыыга 5, төрүт ох саанан ытыыга 6 миэстэлэри ылбыттара.
Иккис үрдэли Ленскэй нэһилиэк дабайар. Кинилэр 9 улахан хамаандаттан волейболга 9, мээчиги быраҕыыга 5, дартска 1, буулдьанан ытыыга 1, төрүт ох саанан ытыыга 1 миэстэлэри ылаттаабыттара. Көрдөххө, миэстэлэр кыраайтан кыраайга.
Үһүс бочуоттаах миэстэҕэ Партизан нэһилиэгин депутаттара тахсаллар. Партизаннар волейболга 3, мээчиги быраҕыыга 2, дартска 5, буулдьанан ытыыга 4, төрүт ох саанан ытыыга 3.
Кыра нэһилиэктэргэ үс бириистээх миэстэлэри ылбыттар араа-бараа сылдьаллар. Уопсай түмүккэ 12 очкону көрдөрбүт Салбаҥ (волейболга 3, мээчиги быраҕыыга 1, дартска 1, буулдьанан ытыыга 4, төрүт ох саанан ытыыга 3) кыайыылааҕынан ааттанар. Иккискэ 13 очколаах Арбын (волейболга 2, мээчиги быраҕыыга 3, дартска 5, буулдьанан ытыыга 2, төрүт ох саанан ытыыга 1) тахсар уонна 14 очколаах Түбэ (волейболга 1, мээчиги быраҕыыга 2, дартска 4, буулдьанан ытыыга 5, төрүт ох саанан ытыыга 2) үһүс буолар.
Нам улууһун депутаттара буолаары турар Россия Президенин быыбарыгар көхтөөхтүк кыттарга ыҥырдылар.
Харысхан Попов