Алдан, Нерюнгри куораттарга кэлэр нэдиэлэттэн спорт кыһыҥҥы көрүҥнэригэр Саха сирин V спартакиадата саҕаланыаҕа. Кулун тутар 25-31 күннэригэр кыһыҥҥы спартакиадаҕа Нам улууһуттан 50-тэн тахса спортсмен кыттыыны ылыаҕа.
2024 сылга V төгүлүн ыытыллар спартакиада көрүҥнэрэ үксэ Алдаҥҥа буолуохтара: хайыһарынан куоталаһыы, биатлон, хайыһарынан спортивнай ориентирование, хайыһарынан кыһыҥҥы многоборье, шорт-трек, сноуборд, хайыһарынан туруору сыыртан түһүү (горнолыжка), хотугу многоборье. Оттон фигурнай хаҥкы уонна хоккей Нерюнгрига былааннанар.
Улуустааҕы спорт управлениетын салайааччыта Павел Иванов хамаандата Нерюнгрига сарсын айанныаҕа. Онтон өйүүн, кулун тутар 23 күнүгэр Сергей Софронов салайааччылаах бөлөх Алдан куоракка турунуоҕа. Нам хоккеистара, хайыһардьыттара күрэхтэһии буолуохтаах сирдэригэр тиийэннэр оннуларын булбуттар. Бу күннэргэ сүүмэрдэммит хамаанданы күүтэллэр.
Урукку кыһыҥҥы спартакиадалары санаатахха, Нам улууһа 2012 сыллаахтан толору хамаанданан күрэхтэспитэ. Ол курдук, хамаанда 2012 сыллаахха бэйэтин бөлөҕөр бастаабыта, 2016 сыллаахха иккис миэстэ буолары ситиспитэ. 2020 сыллаахха пандемия биллэриллэн кыттыыны ылбатаҕа.
Харысхан Попов