Нам улууһугар хапсаҕай федерациятын Кубога күн устата буолла. Көбүөргэ Хамаҕатта, 2 Хомустаах, Хатырык, Хатыҥ Арыы, Ленскэй нэһилиэк 17 хапсаҕайдьыттаах хамаандалара көрүстүлэр.
Ленскэй нэһилиэк тугу да тулуппат күүстээх састааптаах хамаанданы туруорбут дииллэрэ оруннаах. Ол курдук, Нам сэлиэнньэтин сүүмэрдэммит хамаандата барыларын 11:6 ахсаан оҥорон кыайыылаах үрдүк аатын ылла. Ылан көрдөххө, 5 нэһилиэк ааттаах-суоллаах бастыҥ хапсаҕайдьыттарын өрө тутан туһунна. Ол иһин, Горнайга буолбут “Манчаары оонньууларыгар” Нам улууһа уопсай түмүккэ 3-с миэстэҕэ тахсарыгар хапсаҕайдьыттарбыт кыайыылара элбэҕи оонньообута. Хапсаҕай – биһиги улуус киэн туттуубут, былаахпыт буолара оруннаах.
Нам улууһун хапсаҕайга федерациятын председателэ Андрей Кузьмин өрөспүүбүлүкэҕэ улууспут хапсаҕайдьыттара бастыҥнар истэригэр баалларын бигэргэтэр.
“Өрөспүүбүлүкэ Нам улууһа биир бастыҥ хапсаҕайдаах улуус буоларын билинэр. Ол курдук, 8 сыл устата өрөспүүбүлүкэ федерациятын Кубогар 3 иһигэр олоробут.
Кэлэр сылга Саха сирин олимпиадата “Манчаары оонньууларыгар” намнар күүскэ турунуохха. 2025 сыл тохсунньутун бүтүүтүгэр бастыҥнары сүүмэрдиир улуус күрэхтэһиитэ ыытылларын былаанныыбыт”, – диир Андрей Алексеевич.
Игорь Матвеев, Эдуард Максимов, Игорь Софронеев, Александр Румин курдук таһыччы бөҕөстөрдөөх Ленскэй нэһилиэк кэнниттэн иккискэ тахсан турбут Хатырык икки ыйааһыҥҥа бөҕөһө суоҕун бэлиэтиир наада. Иккистээбит хамаанда оҕолорун тустууларын таһыма барыларынааҕар күүстээҕэ, үрдүкү, ойуччу турара көстөн таҕыста. Үһүскэ тахсыбыт Хатыҥ Арыы норуот билиммит хапсаҕайдьыттардааҕа таайдаҕа: Сергей Семенов, Петр Сивцев. Ону тэҥэ, Саха сиригэр, Нам улууһугар боксер быһыытынан биллэр Борис Саввинов бүгүн бэйэтин атын өттүнэн көрдөрдө. Кини күүстээх утарылаһааччыларыгар кыайыылаах хапсыһыынан хардаран “күнэ” таҕыста. Юрий Балаганскайдаах, Марк Барашковтаах, Михаил Аммосовтаах Хамаҕатта сабырыйтаран 4-с буолла. Дэгиттэр 2 Хомустаах ыччата хапсаҕайга бу сылы 5-с нүөмэринэн түмүктээтэ.
Ити курдук, өссө төгүл, бу биэс хамаанда тэҥ баайыылааҕа бүгүн бигэргэннэ. Тэҥ баайыылаах буолуу – очукуонан аахсыы, мөккүһүү, албас оҥорооччулар сыыһа хамнанан мүччү баран охтууларын, сыыһа туттунууларын түгэннэрэ.
Күрэхтэһии кэннитэн, хапсаҕайдьыттар көбүөргэ 75 киилэҕэ диэри уонна 75 киилэттэн үөһэ муҥутуур кыайыылааҕы быһаарыстылар. Муҥутуур кыайыылаахтарынан көҥүл тустууга Россия спордун маастардара Игорь Матвеев (75 кг диэри), Эдуард Максимов (75 кг үөһэ) ааттаннылар. Тустуу, хапсаҕай сүгүрүйээччилэрэ бу уолаттар кыайыылаах тахсалларын күүппүттэрин, астына көрөр бөҕөстөрбүт хапсыһыыларынан дакаастаатылар.
Кыайыылаах хамаандалар, муҥутуур кыайыылаахтар бары сыаналаах бириистэринэн наҕараадаланнылар. Ленскэй нэһилиэк баһылыга Петр Сокольников Эдуард Максимовка 10 000 солк. суумалаах сертификат туттарда. Бу барыта дьаныардаах үлэттэн тахсар.
“Уолаттар бары бэлэмнээхтэр. Баай уопуттаах убайдарым Сергей Семенов, Игорь Софронеев тустуулара үчүгэй. Хапсыһыыларга арыый да тыыным уһун, дьарыктаах буоламмын кыайыы кэллэ диэн тус санаалаахпын”, – диэн санаатын үллэстэр Нам улууһун хапсаҕай федерациятын Кубогын муҥутуур кыайыылааҕа Эдуард Максимов.
Бу курдук Наммыт улууһугар көрүҥнэр федерациялара бэйэлэрин турнирдарын түмүктээтилэр. Күрэстэһии баар буоллаҕына, сайдыы барыаҕа диэн этэн тураммын, быйыл мас-рестлинг федерациятын Кубога сонуннук аан маҥнайгытын М.К. Аммосов аатынан култуура дыбарыаһыгар буолбута. Спорт урукку сылларга култуура дьиэлэригэр буоларын этэн туран, дыбарыаска хаттаан төннүбүтэ – дьон-сэргэ санаатыгар хойукка диэри хаалыаҕа.
Күрэстэһии сайдыыга, сайдыы таһым улаатыытыгар, киэҥ көҕүстэниигэ сирдээтин!
Харысхан Попов