Нам улууһун Хатырыгар Саха сирин ыччата бастакы республикатааҕы М.К. Аммосов Кубогар культурнай-спортивнай слекка мустуоҕа.
Спортивнай слекка Нам улууһуттан, Тааттаттан Чөркөөх, Үөһээ Бүлүүттэн Харбалаах, Ньурбаттан Маалыкай нэһилиэктэриттэн, Бүлүү куораттан уонна республика киин улуустарыттан хамаандалар кэлэллэрэ күүтүллэр. Кыттааччы хамаандалар тэрээһиҥҥэ Саха сирин бастыҥнарын, чулуу уолаттарын Чаҕылхай Махсыым, Исидор Барахов, Платон Слепцов-Ойуунускай, Степан Аржаков уонна Степан Васильев ааттарын ааттыахтара.
Ол курдук, Максим Аммосов төрөөбүт түөлбэтигэр ыччат атырдьах ыйын 17-19 күннэригэр спортивнай күрэхтэһиилэргэ, культурнай конкурстарга уонна да атын элбэх тэрээһиннэргэ кыттыаҕа.
Араас улуустан кэлбит хамаандалар бэйэни билиһиннэрии, патриотическай тыыннаах «Славься Отчизна, Россия моя!» ырыаны ыллыахтара, чэпчэки атлетикаҕа 4х200 м эстафетаҕа, “көрдөөх старка”, мас, канат тардыһыытыгар, хапсаҕайга “истиэнэ истиэнэҕэ”, волейболга 3х3 түһүмэхтэригэр тургутуһуохтара. Ону тэҥэ, кыттааччылар грант өйөбүлүгэр федеральнай экспертэн уонна Ыччат парламенын председателэ Антон Васильевтан дириҥ ис хоһоонноох үөрэх ылыахтара.
Харысхан Попов