Бүгүн, ахсынньы 12 күнүгэр, Нам улууһун Хатырыгар үөрүүлээх быһыыга-майгыга саҥа баһаарынай депону астылар. Маны сэргэ, Таатта Баайаҕытыгар, Алдан Уус Тааттатыгар, Уус Алдан Дүпсүнүгэр арылыннылар.
Үөрүүлээх тэрээһиҥҥэ СӨ Правительствотын председателин бастакы солбуйааччыта Дмитрий Садовников, СӨ Гражданскай оборона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министр Дмитрий Лепчиков, СӨ Баһаары утары государственнай сулууспа салайааччыта Руслан Босиков, СӨ Быыһыыр сулууспатын начальнига Иннокентий Андросов быһа сибээһинэн, Нам улууһун, Хатырык нэһилиэгин салалтата, ыҥырыытаах ыалдьыттар кыттыыны ылан эҕэрдэлэрин тириэртилэр.
Нам улууһун СӨ баһаары утары государственнай сулууспатын 23-с №-дээх этэрээтин 2-с №-дээх аҕыйах ахсааннаах баһаарынай чааһын (МПЧ) үлэһиттэрэ толору хааччыллыылаах, бары усулуобуйа барыта баар дьиэлэннилэр-уоттаннылар, саҥа тэриллэринэн хааччылыннылар. Объегы Михаил Гуляев генеральнай директордаах «ГМ Групп» ХЭТ туппут.
Санатан эттэххэ, бу иннинэ үлэлии олорбут дьиэлэрэ 80-нус сылларга тутуллубут. Сылын аайы улуус дьаһалтатын уонна толорор былаас отчуотугар саҥа тутууну туруорсуу буолара. Быйыл халаан уутуттан урусхалланан өссө эбии хаарбах туруктанан, хамыыһыйа быһаарыытынан чөлүгэр түһэриллибэт буолбута.
МПЧ-га АЦП-6/6-40 (Урал5557) уонна АЦ-4,0-40 (43206) техникалаахтар. Хатырык, Маймаҕа, Түбэ, Модут нэһилиэктэрин көрөллөр-истэллэр, хааччыйаллар. Өрүс суола аһылыннаҕына Фрунзе, Көбөкөн уонна Арбын эбиллэн биэрэллэр.
Семен Аргунов