Нам улууһугар култуура үлэһиттэрин идэлээх сойуустарын тэрийиитинэн отчуоттуур-быыбардыыр конференция буолан ааста.
Конференция үлэтигэр делегаттар, ыҥырыылаахтар, ону тэҥэ өрөспүүбүлүкэтээҕи кэмитиэт председателин солбуйааччыта Варвара Михайлова, тэрийэр отдел сэбиэдиссэйэ Анна Павлова кыттыыны ыллылар.
Профсоюз активистара биэс сыл устата үлэлэрин түмүгүн таһаардылар уонна туруоруллубут былааны дьүүллэстилэр. Биэс сыллаах үлэ түмүгүн Нам улууһун култууратын идэлээх сойууһун кэмитиэтин председателэ Александра Парникова толору иһитиннэрдэ. Ол кэнниттэн хонуруоллуур-ревизиялыыр хамыыһыйа, ветераннар уонна ыччат сэбиэтэ иһитиннэрии оҥордулар.
Култуура үлэһиттэрин идэлээх сойууһун иһигэр 26 тэрилтэлээх. Ол иһигэр 9 бастакы сүһүөх профсоюзнай кэмитиэт баар, онтон 3-һэ аҕыйах ахсааннаахха киирсэллэр, ол эбэтэр 15 киһиттэн аҕыйах чилиэннээхтэр.
Нам улууһун култууратын бары тэрилтэлэригэр 367 киһи (бу иннинээҕи сылларга – 351, 352) үлэлиириттэн профсоюз чилиэнэ 2023 с. түмүгүнэн 331 (урукку сылларга – 326, 328). 331 чилиэнтэн: 247-тэ дьахтар, 71-рэ ыччат. Улуус үрдүнэн култуураҕа аҕам саастаах — 88 ветераннаах, кинилэртэн бочуоттаах сынньалаҥҥа олорооччута – 69, тыыл ветераннара – 2, сэрии кэмин оҕолоро – 13, үлэлии сылдьааччыта – 19.
Идэлээх сойуус кэмитиэтин сүрүн сыалынан үлэһиттэр бырааптарын, интириэстэрин көмүскээһин буолар, ол инниттэн хас биирдии бастакы сүһүөх тэрилтэ сүрүн көмүскэлинэн буолар коллективнай дуогабардаах буоларын ситиһэллэр. Тэрилтэлэр салайааччылара, эппиэтинэстээх чилиэннэр Үлэ харыстабылыгар кууруска, семинарга үөрэнэллэрин куруутун өйүүр. Ааспыт сылларга 59 үлэһит үөрэҕи ааспыт. Хас биирдии тэрилтэ профсоюзнай стендэлээх буоларын ситиһэллэр, тэрилтэлэринэн сылдьан бэрэбиэркэлииллэр, ыйыы-кэрдии биэрэллэр. Ону ситиһэргэ куонкурус биллэрэллэр. Хас биирдии үлэһит тылынан эбэтэр суругунан боппуруоһугар улахан болҕомто ууруллар.
2022 сылтан кулун тутар 25 күнүн (сылын ахсын) култуура үлэһиттэрин идэлээх бырааһынньыгын төлөнөр өрөбүл күнүнэн биллэрэргэ улуус депутаттарын сэбиэтигэр туруорсан, «Нам улууһа» МТ баһылыга Юрий Слепцов дьаһала тахсыбыта. 2023 с. улуустааҕы кэмитиэт сайт оҥорон үлэлэппитэ https://uluskomnam.ru/, онон чилиэннэргэ куйаар ситимин нөҥүө иһитиннэриини тиэрдэ олороллор.
Үлэһиттэр уонна кинилэр оҕолорун сынньалаҥнарыгар улахан болҕомто ууруллар, бу биир эмиэ сүрүн сорук буолар. Биэс сылга санаторийга-курорка эмтэниигэ 31 үлэһиккэ, 1 оҕоҕо көмө оҥоһуллубут. Ону таһынан, профсоюз чилиэннэрэ, оҕолоро эмтэнэ, операциялана баралларыгар материальнай көмө балаһыанньатынан өйөбүл оҥоһуллар. Биир идэлээхтэрин туох баар кыһалҕатыгар, ыксаллаах быһыыга-майгыга күүс-көмө буолаллар. Байыаннай дьайыыга сылдьар кэргэттэрдээх, оҕолордоох үлэһиттэргэ көмөлөһөллөр. Кыайыы туһугар ыытыллар акциялартан туора турбаттар.
Улуустааҕы култуура үлэһиттэрин идэлээх сойууһун кэмитиэтэ 15 чилиэннээх, ол иһигэр ыччат сэбиэтэ, ону таһынан хонтуруоллуур-ревизиялыыр хамыыһыйа – 3 чилиэннээх үлэлээн кэллэ. Үлэ сылын ахсын бары сектордар сыллааҕы былааннарын оҥостон, уопсайа 8 хайысхалаах былаан ылынан үлэлээтэ. Өрөспүүбүлүкэтээҕи култуура үлэһиттэрин идэлээх сойуустарын кэмитиэтин кытары ыкса сибээстээхтик үлэлииллэр. Үгүс куонкурустарга, акцияларга ситиһиилээхтик кытыннылар. Кинилэр былаанынан ыытар тэрээһиннэригэр көхтөөхтүк кыттыыны ылаллар. Семинардарга, лекцияларга, үөрэхтэргэ председателлэр, чилиэннэр сылдьан үгүс билиини ылаллар, туһаналлар.
Араас хабааннаах «Собери ребенка в школу», «Протяни руку помощи», «Молодые специалисты культуры» көмө акциялар чэрчилэринэн өйөбүл көрүллэр. Онтон улуустааҕы кэмитиэт чилиэннэрин туйгун үөрэхтээх оҕолоругар сылын аайы «Ассамблея достижений» акция тэрийэн биэс сылга 347 үөрэнээччини хапта. Быйыл күһүн «Здравствуй. Школа!» акция оҥорон халаан уутуттан эмсэҕэлээбит үлэһиттэр оҕолоругар, СВО-ҕа сылдьар буойуттар дьиэ кэргэттэрин оҕолоругар үөрэххэ аналлаах тэриллэри туттарбыттара.
Бэтэрээннэргэ улахан болҕомто ууруллар. Бэлиэ күннэргэ куруутун бэлэх туттарыллар, тэрээһиннэргэ сырытыннараллар. Улууспутугар уонна култуура эйгэтигэр ытыктанар Раиса Горохова түмсүү тэрийэн холобурга сылдьаллар. Ыччаты кытары үлэ күүскэ ыытыллар. Тэрилтэлэр икки ардыларыгар күрэхтэһиилэр тэриллэллэр. Эт-хаан өттүнэн сайдыыга араас хабааннаах акциялар буолаллар.
Улуустааҕы култуура үлэһиттэрин идэлээх сойууһун кэмитиэтин 5 сыллааҕы үлэтэ биһирэннэ. Отчуоттуур-быыбардыыр конференция түмүгүнэн салгыы 5 сылга председателинэн Александра Парникова биир санаанан быыбарданна, 7 саҥа чилиэннэр талылыннылар.
Өрөспүүбүлүкэтээҕи кэмитиэт председателин солбуйааччыта Варвара Михайлова саҥа олохтоммут «За социальное партнерство» бэлиэни «Хатыҥ Арыы нэһилиэгэ» МТ баһылыгар Иван Ноговицыҥҥа, П.И. Сивцев аатынан история уонна этнография музейын директорыгар Александр Копыриҥҥа, өр кэмнэргэ үлээбит култуура идэлээх сойууһун чилиэннэригэр анал бэлиэлэри, махтал суруктары туттартаата.
Семен Аргунов