Сергей Егоров ааспыт сылга Намнааҕы техникумҥа үөрэнэн үһүс разрядтаах парикмахер идэтин ылбыта. Кини социальнай контракт туһунан билэр дьонуттан истэн, ирдэнэр докумуоннары хомуйан, бэйэтин дьыалатын сайыннарарга 250 тыһыынча солкуобайдаах көмө ылбыт.
Сергей оскуола кэнниттэн Илья Винокуров аатынан Намнааҕы педагогическай колледжка үөрэнэ киирбитэ уонна ситиһиилээхтик бүтэрбитэ. Эбии үөрэх педагогун быһыытынан хас да сыл үлэлээбитэ. Бэйэтэ кэпсииринэн, чугас доҕотторун, аймахтарын баттахтарын кырыйарын сөбүлүүр эбит.
«Хайа эрэ кэм ааспытын кэнниттэн, сөбүлүүр дьарыкпынан хамнастанан саҕалыыр туһунан өй-санаа киирбитэ. Бу кэнниттэн социальнай ситимнэргэ биллэриилэри тарҕаппытым уонна килийиэннэрбин дьиэбэр кырыйар этим. Онтон өҥө испииһэгин кэҥэтэр санааттан, парикмахер идэтигэр үөрэнэн, сатабылбын үрдэтиэхпин баҕарбытым”, – диир парикмахер.
Сергей социальнай көмүскэл олохтоох салаатыгар тиийэн судаарыстыба көмөтүнэн туһаныан иннинэ, нэһилиэнньэ дьарыктаах буолуутун иһинэн үлэлиир сыахха үөрэммит. Ол курдук, Розалия Касьяноваҕа парикмахерскай искусствоҕа үөрэнэри ситиспитэ уонна ситиһиилээхтик үөрэммитин туһунан туоһулуур суругу ылбыта.
“Үлэлиирим таһынан элбэхтэ үөрэммитим. Курстары тэҥэ өссө парикмахер уонна бэйэтин дьыалатыгар маастар Валентина Поповаттан элбэҕи иҥэриммитим. Баччааҥҥа диэри кинилиин бииргэ үлэлиибит. Парикмахерскай өҥөҕө нэһилиэнньэ ирдэбилэ биллэ улааппытын кэлин бэлиэтээбитим. Социальнай контракка киириэххэ наада эбит диэн санаалар кэлбиттэрэ”, – диир Сергей.
Сөбүлүүр дьарыгынан дьарыктанааччы докумуоннары хомуйууга уонна бизнес-былаан суруйууга көмө, өйөбүл ылаары, маҥнай олохтоох “Бизнес-Инкубаторга” уонна Нам сэлиэнньэтин дьаһалтатыгар кэлбит. Нам улууһугар “Мой бизнес” киин бэрэстэбиитэлэ Марфа Тарабукина соцконтракт түһэрсэргэ туох докумуоннар наадаларын быһаарбыт уонна сайабылыанньаны, бизнес-былааны сөптөөхтүк оҥорорго көмөлөспүт.
“Ленскэй нэһилиэк олохтоох дьаһалтатын специалистарыгар уонна Марфа Семеновнаҕа көмөлөрүн иһин махтанабын! Кинилэр көмөлөрүнэн ирдэнэр докумуоннары түргэнник биэрбитим, хамыыһыйа иннигэр бизнес-бырайыакпын ситиһиилээхтик көмүскээбитим. Аккаастаан кэбиһиэхтэрэ диэн долгуйар этим, ол эрээри, бостуой куттаммыппын. Хамыыһыйа миигин болҕойон истибитэ уонна сайаапканы биһирээбитэ. Бэрт сотору кэминэн, тус счеппар көмө харчы түспүтэ. Онон парикмахерскай инструменнары уонна матырыйааллары атыыласпытым,” – диэн бэйэтин санаатын үллэһиннэ.
Сергей социальнай көмө ылар түгэнигэр, бизнес-былааныгар ороскуотун бүтүннүү сиһилии суруйбута. Сөбүлэһии түһэрсээт, 250 тыһ. солк. суумаҕа кини тута баттах кырыйарга сөптөөх профессиональнай машинка, триммер, фен, инструменнарга туттуллар ультрафиолетовай стерилизатор, парикмахерскай кыптыый, барбер кириэһилэ, пылесос уонна да атын техническэй малы-салы атыыласпыта.
“Соцконтракт көмөтүнэн, оҥорор өҥөм хаачыстыбатын улаханнык үрдэттим. Билигин клиеннэрим үрдүк кылаастаах сиэрбиһинэн туһаналлар. Клиеннэргэ усулуобуйа бары өттүнэн табыгастаахтык уонна тупсаҕайдык оҥоһулунна дии саныыбын.
Урбаан эйгэтигэр ордук көҥүллүк сылдьарбын сөбүлүүбүн. Холобура, бизнескэ бэйэҥ эрэ иннигэр отчуоттуугун, үлэҕэр-хамнаскар толору эппиэтинэһи бэйэҥ ылынаҕын, бириэмэҕин бэйэҥ дьаһанаҕын – саамай үчүгэйэ бу. Ону тэҥэ бэлиэтиэхпин баҕарабын, бэйэ дьыалатынан дьарыктанар буоллаххына, нолуогуҥ төлөбүрэ намыһах буолан тахсар”, – диэн кэпсиир парикмахер.
Баттах кырыйар бизнеһи салайан саҕалыырыгар, «Мой Бизнес» киин тэрийэн ыытар үөрэх тэрээһиннэригэр элбэхтик сылдьыбыта. Кини ордук үп-харчы, урбаан эйгэтин сүрүн үөрэхтэрэ уонна маркетинг семинардарын олус сөбүлээбитэ. Сергей тылыттан, “Мой Бизнес” киин маннык тэрээһиннэри ыытара саҥа саҕалааччыларга туһалаах. Ол курдук, урбаан эйгэтигэр саҥа киирээччилэр бизнес үгүс өрүттэригэр ыарахаттары көрсөллөр. Ол да иһин көмөлөөх семинардар, вебинардар ыытыллаллара этиллэр.
«Саҥа саҕалыыр урбаанньыттарга профессиональнай ситиһиилэри, махталлаах клиеннэри уонна таһаарыылаах үлэни баҕарабын! Ону сэргэ, судаарыстыба өйүүр дьаһалларыгар болҕомтоҕутун уураргытыгар сүбэлиибин. Чуолаан, судаарыстыба көмөтө бизнес атаҕар турарыгар, сайдыыны ыларыгар улахан көмөлөөх буолаллар”,– диэн түмүктүүр маастар Сергей Егоров.
«Мой Бизнес» киин «Дьоҕус уонна орто урбаан» национальнай бырайыак чэрчитинэн, Саха сирин бизнеһигэр киэҥ өҥөнү босхо оҥороллорун санатабыт.
Харысхан Попов