Байыаннай дьайыы кыттыылаахтарын өйүүр аһымал акцияҕа Нам улууһун оскуолаларын бизнес-инкубатордара көхтөөхтүк кытыннылар. Бу туһунан улуус үөрэҕин управлениета иһитиннэрэр.
«Нам улууһа» МТ баһылыга Юрий Слепцов көҕүлээһининэн, бу дьыл алтынньы 17 күнүгэр байыаннай дьайыы кыттыылаахтарын өйүүр улуустааҕы акция ыытылынна. Манна оскуолалартан көхтөөх кыттыыны Модут, Партизан, 1 Хомустаах, 1 №-дээх Нам, Хатыҥ Арыы, Түбэ, Оҕо эйгэтин түөлбэтэ, Салбаҥ, 2 Хомустаах оскуолатын бизнес-инкубатордара ыллылар.
М.К. Аммосов аатынан культура дыбарыаһын киэҥ-куоҥ фойетыгар оскуолалар киэҥ хабааннаах араас бородууксуйаларын быыстапка-дьаарбаҥкатын тэрийдилэр. Үөрэнээччилэр кыһанан-мүһэнэн бэйэлэрин илиилэринэн оҥорбут араас сувенирдарын, бэлэхтэрин, сонун оҥоһуктарын уонна да араас бородууксуйаны дьон хамаҕатык атыыласта.
Дьаарбаҥка түмүгүнэн, 9 оскуола бизнес-инкубатордарын учууталлара уонна үөрэнээччилэрэ байыаннай дьайыы кыттыылаахтарын өйүүр фондатыгар барыта 70 тыһ. солк. тахса сууманы туттардылар. Инникитин оскуола бизнес-инкубатордарыгар таһаарыылаах, ситиһиилээх, сайдыылаах үлэни баҕарабыт диэн улуус үөрэҕин управлениета иһитиннэрэр.
Лена Ноговицына