Алтынньы 30 күнүгэр оскуола музейдарын муниципальнай куратора Елена Шарапова оскуолалар музейдарын салайааччыларыгар үөрэтэр семинар ыытта. Семинарга барыта 18 оскуола музейын салайааччыта кытынна.
СӨ үөрэҕин уонна наукатын министерствотын «2023 с. СӨ бары үөрэҕин тэрилтэлэригэр музейдары тэрийии туһунан» бу дьыл олунньу 20 күнүнээҕи бирикээһинэн бары оскуолаларга музей тэрийиитин боппуруостара, түбүгэ-садьыга бара турар. Билиҥҥи туругунан, 13 оскуолаҕа: Намнааҕы гимназияҕа, Модут, Бөтүҥ, 1 Хомустаах, Хатырык, Нам 2 №-дээх, Маймаҕа оскуола-саада, Көбөкөн, Намнааҕы алын сүһүөх оскуолатыгар, 2 Хомустаах, Искра, Таастаах, Хатыҥ Арыы оскуола музейдарын федеральнай реестрыгар регистрацияланарга логин уонна пароль туттулар. Ордубут 12 оскуола музейдарыгар туспа электроннай почта оҥостон улуус уопсай сайаапкатынан логин уонна пароль ылыахтара. Бу үлэни түргэтэтэргэ 5 рабочай бөлөх тэриллэн көмөлөһүөхтэрэ. Нам улууһун үөрэҕин управлениетын бу дьыл балаҕан ыйын 15 күнүнээҕи «Оскуола музейдарын тэрийии туһунан» бирикээһигэр олоҕуран сэтинньи 15 күнүн кэнниттэн анал комиссия музейдары көрөр, бэрэбиэркэлиир үлэни саҕалыаҕа.
Нам улууһугар 10 оскуола музейдаах. 15 оскуолаҕа музей муннуктарын тэрийии үлэтин бастакы хардыылара оҥоһуллан эрэр. Маныаха музей муннугар булгуччулаах бэрээдэгинэн 3 стендэ: нэһилиэк историятын көрдөрөр; 1941-45 сс. Аҕа дойду Улуу сэриитин тематыгар; байыаннай дьайыы тематыгар, маны тэҥэ, биллиилээх дьон аатын сүгэр оскуолаларга киниэхэ анаммыт стендэ оҥоһуллуохтаах.
Хамаҕатта орто оскуолата «Оскуола музейыгар бэлэх» диэн нэһилиэнньэ ортотугар акция биллэрэн оскуола историятын кэпсиир, көрдөрөр экспонаттары уонна матырыйааллары хомуйан саҕалаата.
Бөтүҥ оскуолатын музейа
Үөдэй
Үөдэй
Лена Ноговицына