Бүгүн 1 Хомустаах «Эйгэ» саҥа үйэ модельнай библиотекатыгар кинигэ сүрэхтэннэ. Нам улууһун 1 Хомустаах нэһилиэгин төрүт олохтооҕо, СӨ физическэй культура уонна спорт туйгуна, СӨ спордун уонна үлэтин бэтэрээнэ, волейболга бэтэрээннэр ортолоругар СахаВА бочуоттаах маастара, «СӨ волейбол сайдыытын иһин «, «Нам улууһугар спорт сайдыытыгар үтүөлэрин иһин», » Нам улууһа» МТ сайдарыгар өҥөтүн иһин» бэлиэлэр хаһаайыннара, Арассыыйа суруналыыстарын уонна СӨ Суруйааччыларын сойуустарын чилиэнэ Софронов Анатолий Михайлович — Онтуон «Нам улууһун спордун сулустара» диэн ааттаах кинигэтэ сүрэхтэннэ.
Кинигэ 2023 сылга Саха сиригэр физкультурнай хамсааһын төрүттэммитэ 100 сылыгар ананар. Нам улууһун спордун историятыгар киирбит, спорт сайдыытыгар бэйэлэрин кэмнэригэр тус кылааттарын киллэрбит уонна ситиһиилэммит спортсменнар, оройуоҥҥа, өрөспүүбүлүкэҕэ уонна дойду тас өттүгэр бастакы кыайыылаахтар, рекордсменнар, Саха АССР, ССРС, Саха өрөспүүбүлүкэтин уонна Арассыыйа спордун бастакы маастардара сырдатылыннылар. Сэрии кэннинээҕи ыар олоххо 1945-1950 сс. Саха сиригэр физкультура уонна спорт үлэһиттэрэ, тренердэрэ саҥа олох үөһүгэр өрө көтөҕүүлээхтик ылсан, спорт үлэтин уонна тэрээһинин чөлүгэр түһэрбиттэрэ.
Суолталаах тэрээһиҥҥэ «Офсет» ХЭТ менеджерэ, СӨ суруйааччыларын сойууһун ситэриилээх Сүбэтин чилиэнэ, СР үөрэҕириитин туйгуна Галина Басылыйканова-Кэнтик Кыыһа, улуустааҕы «Отуу уота» литературнай түмсүү салайааччыта, чилиэннэрэ, кинигэҕэ киирбит спорт сулустара ыалдьыттаатылар.
Лена Корякина