Атырдьах ыйын 15-20 күннэригэр Томскай куоракка 14-с сылын ыытыллар «Праздник топора» норуоттар икки ардыларынааҕы норуот идэтин фестивала буолан ааста. Төрүт үгэһи киэҥ эйгэҕэ таһаарар фестиваль «Туризм и индустрия гостеприимства» национальнай бырайыак чэрчитинэн ыытыллар.
Өбүгэлэрбит үтүө үгэстэрин, култуураларын сырдатар, үйэтитэр улахан суолталаах тэрээһиҥҥэ Дьокуускай Тулагытыттан, Мирнэйтэн уонна Нам улууһуттан тарбахтарыгар талааннаах алта биир дойдулаахтарбыт, уопсайа Саха сирин аатыттан 9 киһи кыттыыны ылбыт. Нам улууһуттан Арассыыйа норуотун маастара Татьяна Карамзина салайааччылаах дьоммут кыттыыны ыллылар. Ол курдук, Аппааныттан СӨ норуотун маастара, туосчут Любовь Попова сиэнинээн Григорий Жирковтуун, Үөдэйтэн норуот уус-уран оҥоһугун маастара Мария Зырянова, Намтан мас уустара Василий Аргунов, Николай Суздалов буоланнар ситиһии көтөллөөх кэллилэр.
Татьяна Карамзина балаһыанньаны көрөн, эрдэ Нам улууһун уран тарбахтаахтарын үлэлэрин Томскай куоракка ыытан, фестивальга кыттарга ыҥырыы кэлбит. Онон кыттыылаахтарга барыы-кэлии төлөбүрэ, гостиницаҕа олоруу, портка илдьии-аҕалыы өҥөтө барыта босхо буолла, — диэн Любовь Попова үөрэ-көтө кэпсиир. Фестифальга кытта кэлбит ыалдьыттары арыаллаан гостиницаҕа хосторун булларан биэрбиттэрин, күҥҥэ үстэ босхо аһаппыттарын, туох баар усулуобуйуйаны тэрийбиттэрин, мунаахсыйар боппуруостарын тутатына быһааран иһэллэрин сөхпүттэр. Куорат мэрэ хаста да кэлэн фестиваль кыттыылаахтарын көрсөн, кэпсэтэн барбыт. Тэрээһин олус үрдүк таһымнаах эбит, 198 кыттааччыны барыларын бырайыастаан, арыаллаан илдьэ сылдьыы үтүө холобур, өйдөбүл буолар.
Норуоттар икки ардыларынааҕы фестивальга Арассыыйаттан уонна тас дойдулартан элбэх кыттааччы кэлбит, ол курдук Кытайтан, Монголияттан о.д.а., дойдубут араас куораттарыттан улахан маастардар түмсэннэр «Берестяной хоровод» диэн күрэххэ 30-ча киһи кыттыбыт. «Праздник топора» фестивальга мас, тимир уустара, гончардар кыттыыны ылбыттар. Тэрээһин куораттан 17 км тэйиччи турар Зоркальцева сэлиэнньэтин «Околица» диэн пааркатыгар буолбут, онно күн аайы автобуһунан таспыттар.
Кыттааччылар үс күн устата маастар кылаастарга, быыстапкаларга, күрэхтэргэ кыттыыны ылбыттар. Төрдүс күҥҥэ тэрээһини түмүктүүр, чиэстиир-бочуоттуур күн буолбут. Любовь Попова, Григорий Жирков А.Ф. Киорр председателлээх «IV Межрегиональный конкурс мастеров по художественной обработке бересты «Берестяной хоровод» диэн күрэхтэһии «Семейный очаг» наставник» номинация дипломунан, мас хахтаах суруга туоска түһэриллибит блокнотунан наҕараадаламмыттар. Татьяна Карамзина иккис бочуоттаах миэстэни ылары ситиспит.
Нам улууһун чиэһин ыраах Томскай куоракка тиийэн ситиһиилээхтик көмүскээн кэлбит бар дьоммутугар махтанабыт. Туппуккут тупсан, ситэн истин, айар талааҥҥыт өссө арылыннын, ситиһии эҥэрдэстин диэн алгыспытын тиэрдэбит. Тарбаҕар талааннаах киһи ханна да тиийдин — норуотун ааттатар, киэҥ эйгэҕэ таһаарар.
Надежда Сивцева, Аппааны