Нам улууһугар сокуоннай саастарын ситэ илик оҕолор буруйу оҥоруулара күн-түүн элбиир чинчилээх. Бу салааҕа Ленскэй нэһилиэк олохтоох дьаһалтата күүстээх үлэлэри тохтоппокко ыытан кэллэ уонна салгыыр. Холобура, салалта болҕомтотун сытыытык турар кыһалҕаларга уурар: түүҥҥү рейдэлэри тэрийиигэ, сокуоннай сааһын ситэ илик оҕоҕо энергетическэй утахтары, табахтары атыылаабат туһуттан урбаанньыттары кытта кэпсэтиигэ.
Күүһү холбоон баар кыһалҕалары туоратарга Ленскэй нэһилиэк уонна Хатыҥ Арыы дьаһалталара көрүстүлэр. Кэпсэтии сүрүнэ буолар, тустаах үлэҕэ нэһилиэктэр дьахтар уонна аҕа сүбэлэрин кытта үлэни тэҥҥэ ыытыы. Аны туран, байыаннай дьайыы кыттыылаахтара эйэлээх олоххо эргилиннэхтэринэ, кинилэри толору реабитациялыыр киин тэрийэргэ хамыыһыйа тэрийии. Икки өттүттэн бу ыйытыы улуус таһымыгар быһаарылларын эттилэр. Дьиэ кэргэҥҥэ эйэ, өйдөһүү баар буоллаҕына оҕо дьоллоох буола улаатыаҕа.
Бэйэлэрин өттүлэриттэн Нам улууһун ПДН аҕа инспектора Любовь Атласова, Намнааҕы «Берегиня» филиал социальнай педагога Татьяна Степанова этиилэри киллэрдилэр.
Инникитин, дьаһалталар икки ардыларыгар маныаха сыһыаннаах кэпсэтии ыытыахтара, бэйэлэрин уопуттарын атастаһыахтара, санааларын этиэхтэрэ. Мантан инньэ, Ленскэй нэһилиэк уонна Хатыҥ Арыы бииргэ профилактическай тэрээһиннэри оҥорорго бэлэмнэрин биллэрдилэр.
Харысхан Попов