Сэтинньи 8-12 күннэригэр Иваново куоракка орто уонна аҕа саастаах ветераннар ортолоругар остуол тенниһигэр Россия чемпионата ыытыллыбыт. Намтан Евдокия Староватова уонна Елизавета Матвеева өрөспүүбүлүкэ хамаандатыгар киирэн турнирга кыттыбыттар. Бу туһунан “Спорт Якутии” сайтыгар остуол тенниһин ветерана Василий Данилов суруйбут.
Евдокия Васильевна Россия чемпионатыгар 2015 сылтан кыттар, оччолорго кини бэйэтин саастаахтарыгар Россия чемпиона буолбут. Оттон Елизавета Степановна араас дойдуларынан сылдьан, саамай киэҥ географиялаах спортсмен буолар. Холобура, аҥаардас кэнники сылларга Турцияҕа, Монголияҕа, Кытайга, Крымҥа, Бурятияҕа, Москваҕа, Пермьҥа, Тамбовка уо.д.а. араас турнирдарга кыттан, үчүгэй көрдөрүүнү ситиһэр.
Иваново куоракка ыытыллыбыт чемпионакка 70-74 саастаах дьахталлар ортолоругар Елизавета Матвеева икки маастар кэнниттэн боруонса мэтээли ылары ситистэ. Киниэхэ чиэс, бочуот уонна хайҕабыл!
Дьахталларга пааранан күрэххэ Евдокия Староватова, Елизавета Матвеева үрүҥ көмүс мэтээли ыллылар. Кинилэр быһаарыылаах 5-с партияҕа утарсааччыларыттан кыра ахсаанынан кыайтарбыттар. Партия уопсай ахсаана 2:3 тэҥнэспит.
Бу ааттаах-суоллаах турнирга республикабыт чиэһин 14 киһи, ол иһигэр 5 эр киһи, 9 дьахтар көмүскээбиттэр.
Майя Федорова
Хаартыскалар: «Спорт Якутии»