Нам улууһун оскуолаларын үөрэнээччилэригэр национальнай көрүҥнэргэ фестиваль икки күн устата ыытыллыаҕа. Оҕолор бүгүн хабылыкка, хаамыскаҕа, национальнай ыстаныыга, төрүт ох саанан ытыыга күрэхтэстилэр.
Бэлиэтээн эттэххэ, Нам улууһугар Юрий Балаганскай дириэктэрдээх Оҕо спордун киинэ тэриллэн хорутуулаах үлэ быйылгыттан саҕаланна. Ол курдук, болҕомто төрүт көрүҥнэри өрө тутууга ууруллар. Аан маҥнайгытын ыытыллар 6 көрүҥнээх национальнай көрүҥнэргэ фестиваль үөрүүлээх аһыллыыта тохсунньу 25 күнүгэр култуура спорт комплекска 10.00 ч чаастан буолуоҕа.
Көрүҥҥэ барытыгар толору оҕолоох хамаандаларынан Намнааҕы 1-кы уонна 2-с нүөмэрдээх оскуолалар ааттаналлар. Кинилэр бу күрэхтэһии фестивальга 35-тии оҕолоох күрэхтэһэллэр. Хамаҕатталар: Хамаҕатта орто оскуолаттан – 25 үөрэнээччи, Хамаҕатта саха-француз лицей – 20. Күрэхтэһээччи ахсаана нэһилиэктэртэн: 1-кы Хомустаахтан – 11, Партизантан – 24, 2-с Хомустаахтан – 21, Бөтүҥтэн – 12, Салбаҥтан – 8, Хатырыктан – 17, Көбөкөнтөн – 8.
Ол курдук, бүгүн Хамаҕаттаҕа төрүт ох саанан ытыы көрүҥэр 40-тэн тахса ытааччы, национальнай ыстаныыга 30-тан тахса уонна хабылыкка, хаамыскаҕа 38 кыттыбыттар сымсаларын, түргэттэрин, тулуурдарын көрдөрдүлэр.
Хабылыкка, хаамыскаҕа үтүө түмүгү көрдөрөргө сыалланар саха-француз лицей үөрэнээччитэ Мичил Барашков оонньуур. Оттон национальнай ыстаныыга Искраттан Валентин Никифоров ыстанна. 9-с кылаас үөрэнээччитэ Валентин ордук кылыыны сөбүлүүрүн билинэр. Сарсын уол аны сүүрүүгэ күрэхтэһиэхтээҕин этэр.
Сарсыҥҥы күҥҥэ күрэхтэһээччилэри мас тардыһыы, хапсаҕай, сүүрүү көрүҥнэрэ күүтэллэр. Бэлиэтээн эттэххэ, бу саха норуота саамай ордорор, таптыыр, ыһыытаан-хаһыытаан, долгуйан күүскэ ыалдьар көрүҥнэрэ буолалларынан биллэллэр.
Национальнай көрүҥнэр кыайыылаахтара “Спортивные Якутяне” спартакиадаҕа уонна “Манчаары оонньууларыгар” Нам улууһун чиэһин көмүскүүргэ салгыы дьарыктаныахтара.
Харысхан Попов